Aizawl: Tourism Minister Robert Romawia Royte-in PRASHAD scheme atanga tourism department-in sanction Rs nuai 4,488.52 a hmuh atangin GST Rs. nuai 638.95 leh Labour cess-ah Rs. nuai 41.86 chu Mizoram sumbawmah a lut dawn tih house a hrilh.
Lunglei East bialtu MLA Lawmawma Tochhawng zawhna leh zawh belhna a chhannah a sawi a, Robert-a chuan PRASHAD scheme hmang hian Mizorama pilgrimage leh heritage site hmun li heng – Chite veng Aizawl, Zuangtuia Prayer Mountain Hangi lunglen tlang te, Khuangchera Puk, Ailawng leh Reiek tlang leh Khawruhliana Kalvari tlang tlawhtu leh khualzinte mamawh hrang hrangte siam tura duan a nih thu a sawi a, project hi sorkar laipuiin zaa za a tum tur a nih thu a sawi.
Tourism minister chuan sorkar kum liam ta, kum 2022-2023 chhungin Mizoramah khualzin 2,22,008 an awm thu a sawi a, hun kal tawhah hetiang zat tlawhtu an la awm loh thu a sawi a, kum 2018-2019-ah khualzin 89,766 an awm a, kum 2019-2020-ah 1,61,677, kum 2020-2021 Covid hri len lai a nih avangin khualzin an tlahniam hle tih sawiin mi 20,561 an awm a ni, a ti a, kum 2021-2022 chhungin khualzin 1,32,616 an awm tih a sawi bawk.