Bairabi atanga Sairanga rel luhna tura Sairang zero point bula lei dawh lai, Bridge No. 196 chu nimin chawhma dar 9:30 bawr vel khan a chim a, mi 26 vel an thi.

Lei dawh mek a chim lai hian hnathawk mi 30 bawr vel awmin, a chimpui hi mi 26 vel nia hriat a ni a. Lei dawhna atanga feet 100 vela sangah an tla thla a ni.

Lei dawh a chim tirhah ruang bawisawmtu hmasa, Sairang Dinthar Branch YMA hruaitute sawi danin, a chim tih an hriat veleh hruaitu thenkhatin an pan nghal a, an thlen chuan lei dawh chim avanga thi mi 18-te ruang senghawi hna an thawk nghal a, ruang thenkhat chu thir rit tak takin a lo delh sawp hneh hle a, thenkhat phei chu an a taksate a bung rum a ni.

Rang takin chhanchhuah hna thawh nghal a ni a, ruang lak chhuah a nih mek laiin lei innghahna ban (bridge pillar) chhipah hnathawktu pakhat a tang tih hriat a ni a, Aizawl District Disaster Authority hnuaia Quick Response Team chuan chhanchhuah hna hi thawkin QRT official Lalhriatzuala leh Lalfakzuala te chuan hnathawktu hliam tuar hi metre 100 zeta sang atangin an la thla a ni.

Lei dawh chim vanga nunna chânte ruang hi lak chhuah zel a ni a, he thu buatsaih lai thleng hian ruang 18 lak chhuah tawh a ni a, ruang la lak chhuah loh, lei dawhna hmanraw thir rit tak takin a la delh beh mek hi mi pasarih vel an la awm a, chungte la chhuak tur chuan Mizoram Police, BSF leh NDRF ten theihtawp an chhuah mek a ni.

Chhiattawhna hmun hi Lok Sabha MP C. Lalrosanga, Transport Minister T.J. Lalnuntluanga leh sorkar hruaitu dangten an tlawh nghal a, chhanchhuah hna kalpui dan turte ruahmanna an siampui a ni.

YMA-in chhui duh

AZL: Central YMA chuan thuchhuah siaminlei dawh mek chim chhan dik tak chhui chhuak turin Mizoram sorkar leh railways thuneitute ngen.

Chhiatna thleng chu pawi an tih thu sawiin Central YMA chuan, “He chhiatna thleng vanga boral chhungte a tawrhpui tak zet a, hliam tuarte pawh an dam leh vat theih nan duhsakna a hlan a ni,” an ti.

He chhiatna thlen chhan dik tak chhui chhuaka a mawhphurtu hrem an nih ngei theih nan leh an siam tawh chin pawh mipui tan a him leh him loh enfiah kawnga hma la turin Central YMA chuan Mizoram sorkar leh Railways thuneitute ngenin, nunna chânte leh hliam tuarte zangnadawmna pe ngei turin contractor, ABCI BBJ Joint Venture, Silchar-te an beisei thu an sawi bawk.