- Ruata
Hero MotoCorp 2023 Hero Glamour refreshed version an tlangzarh tawh a. 2023 Hero Glamour 125cc hi chi hnih – Drum leh Disc – a awm a, a man hi Rs 82,348 leh Rs 86,348 (ex-showroom, Delhi) a ni.
Kum 2023 Hero Glamour hian design element thar engemaw zat a dawng a, fully digital console thar, mobile charging port leh i3S technology (Idle Stop-Start System) te a nei bawk. He bike thar hian checkered stripe thar a nei a, hei hian a styling a lamah pawh a rawn chei hle a ni. A landan tam takah chuan a hmaa chhuak nen a inang viau a, thil inthlak liantham lutuk leh design thlak hlawk ang kha a awm rih lo a ni.
Hero Glamour thar hi rider leh pillion seat san zawng chu a indawt danin 8mm leh 17mm in a tihhniam a. Hei hian a khalhtu leh an mi phurh te tan nasa takin awlsamna a siamsak beisei a ni a. Tank profile pawh a hma aiin a phek zawk a, a rider seat zau zawk neiin hei hian chuan a tihnawm viau beisei a ni bawk. Hero Glamour thar hian ground clearance 170mm a nei a. 2023 Hero Glamour 125cc hi rawng chi hrang hrang 3 – Candy Blazing Red, Techno Blue-Black leh Sports Red-Black te a awm a ni.
Glamour thar hian full digital cluster, real time mileage indicator, low fuel indicator, leh integrated USB charger a keng tel a. OBD2 & E20 compliant 125cc engine a nei ang a, hei hian 7500rpm-ah 7.97kW power a pe chhuak a, 6000rpm-ah peak torque 10.6Nm a pe chhuak bawk a ni. A tui heh zawngah chuan 63kmpl a ni a, petrol a heh lo viau a ni. 2023 Hero Glamour hian i3S tech hmangin hei hian a performance, comfort leh mileage a ti tha hle niin company lam chuan an tarlang a ni.
A tlangzarh chungchang Mr. Ranjivjit Singh, Chief Business Officer, India BU, Hero MotoCorp chuan bike larsa tak Hero Glamour thar lo chhuak hian ramchhunga he bike ngainatute tan lawmna a thlen dawn a ni a ti a. Hero MotoCorp-ah hian an thil tum ber chu an customer-te hnena thil danglam bik leh technology lama hmasawnna tha tak pek a ni a ti a. 2023 Glamour rawn chhuak chuan 125cc segment, segment inelna sang ber zingah an company dinhmun a titha lehzual dawn a ni a ti a, market share pawh a tihsan a beisei thu a sawi a ni.
Hero hmalakna dang
Hero hian tun thla tawpah hian Karizma chhuak thar, Hero Karizma XMR tihchhuah an tum a. Hemi tur hian an inpuahchah mek a. Karizma hi miin Hero an duhna chhan lian ber te zinga mi a lo ni tawh thin a. Tuna a thar hlak, khawl chak zawk leh tunlai hmanraw changkang zawk nena thawm tur hian Hero company pawh a rawn tihvul zual zel beisei a ni a. Mi tam takina an lo duh rawn tawh leh mi tam takin an lo lei thin tawh Karizma bike hi a ngaina tute tan chuan a thar a lo chhuak tur hi chanchinthar duhawm tak a ni a. India ram chhuak company rintlak, Mizoramah pawh dealership mumal taj nena inkawlh Hero company ngei atanga bike performance tha leh tunlai mil a lo chhuak thar leh tur hi a nghahhlehawm em em a ni.