Netherlands-a police-te chuan khawvela ruihhlo tawlh rutu lian ber pakhat chu Australia-in man tura thu an chhuah angin an man.
Tse Chi Lop-a hi Chinese, Canadian mi nihna a nei tawh a ni a. The Company hotupa ber nia hriat a ni a, Asia khawmualpuia ruihhlo hralhna, $ tluklehdingawn 70 zet hi an pawl hian an thunun.
Police-ten khawvela mihring an man duh zinga langsar ber pakhat, Tse-a hi Zirtawpni khan Amsterdam-a Schiphol airport-ah man a ni.
Australia chuan an rama a chungthu rel a nih theih nan lak luh dan an dap nghal mek.
Australian Federal Police (AFP) chuan The Company, Sam Gor Syndicate tia hriat bawk hi an rama dan lova ruihhlo tawlh luk 70% vel zet bultumtu niin an sawi.
Australian police hian kum 10 chuang Tse-a hi an lo umzui tawh a, Zirtawpniah khan Canada pan turin a chhuak dawn tih an hre fuh ta a ni.
Police-in thuchhuah an siamah chuan Tse-a hming tar lang lovin, kum 2019 khan manna thupek chhuah a nih thu an sawi a, Interpol atanga hriattirna an dawn angin Netherlands police hian an lo man ta a ni.
Dutch police thupuangtu chuan, “Most-wanted list-a chuang sa a ni a, chhuina thu kan dawn angin man a ni ta a ni,” a ti.
Tse-a man tuma beihpui thlakna, Operation Kungur an tihah hian khawvel ram hrang hranga pawl (agency) 20 chuang an inhnamhnawih a, an zingah hian AFP chu a hmahruaitu ber an nih thu Reuters chuan a tar lang.
Australian chanchinbute chuan an man thei hi kum 20 vel chhunga an police tana hlawhtlinna lian leh pawimawh ber a nih thu an tar lang.
Kum 56 mi, Tse-a hi Mexican drug lord Joaquin ‘El Chapo’ Guzman nen pawh an sumdawnna huang an zauh dan leh a len dan an inan avangin tehkhin hial a ni a. Australian police hian kum 10 chuang Tse-a hi an lo umzui tawh.