India-in thlaa tei kual tura a tirh chhuah, rover chu Nilainia thla chhim tawpa tumpui a nih hnuah thla leilungah a vak kual tan ta.
Chandrayaan-3-in a ken rover hi a tumna khawl, lander atangin a chhuak a, “India chu thlaah a kal kual ta!” tiin space agency chuan a sawi.
Vikram lander hi Nilaini tlaiah khan hlawhtling takin thlaah hian a tum a ni.
India hi thla chhim tawpa tum thei hmasa ber a ni ta a, hetih rual hian US, Soviet Union leh China dawta tum thei hmasa ber a ni ta bawk.
Kg 26-a rit rover hi Pragyaan (Sanskrit tawng finna) tih niin Vikram lander hian paiin thlaah a tumpui a ni.
A tum paha vaivut a tihkhukte a reh hnuah Vikram sira a panel chu hawngin Pragyaan a tawlh chhuahna tur leilawn a indawh chhuak a, thla leilungah tei kual turin a chhuak ta a ni.
Thlaah hian a lung awm dan te, khuar awm dan te a en ang a, data leh thlalak chi hrang hrang zir chian turin lei lamah a thawn let dawn a ni.
Pragyaan hian science hmanraw chi hnih a keng veleh chhawng a, heng zinga mite hian thlaah hian eng ang mineral nge awm tih leh a lei chi eng chemical inpawlhsawpin nge a siam tih te a zir chianna tur a ni.
Pragyaan hi lander nen chauh an inbepawh thei dawn a, ani hian tun hma lama India-in a lo kah chhuah tawh, tun thlenga thla la hel rengtu, Chandrayaan-2 hnenah thawn chhawngin ani hian leiah zir chian turin a thawn chhawng leh dawn a ni.
Indian Space Research Organisation (Isro) chuan rover hi second khatah centimetre khat chauhva chakin a kal tih an sawi a, a ke rukah hian Isro logo leh emblem chuangin a rah chin zelah hnuhma a nei dawn tih a ni.
Thlaa tum hun hi chhun a nih lai a ni a, thlaa ni khat hi khawvela chawlhkar khat daih a ni a, hei vang hian lander leh rover hian ni êng chakna hmanga an battery charge-na turin ni 14 chhung hun an nei dawn tihna a ni.
Zan a nih chuan an in-charge thei dawn lo va, an battery-in a daih loh chinah chuan hna an thawk thei dawn lo va. Ni a lan leh hunah an nung leh thei dawn em tih a la chiang lo bawk.
Lander pawh hian science hmanraw dang a keng tel ve nual a, hengte hi thla leilung awm dan zirna atana hman tur leh a leilung lang chin bakah a chung lam leh a hnuai lam awm dan hriat theihna tur a ni.
Thla hian mineral pawimawh tak tak a nei nual nia ngaih a ni a, tun tuma Chandrayaan-3 tum ber erawh tui a awm leh awm loh fiah a ni a. Scientist-te chuan chhim tawpa khuar eng emaw zat awmah hian vur khang ni awm tak tak an hmu a, hei hi a ni ngei em tih finfiah an duh a, tui a lo nih chuan nakina thlaa khawsakna atan pawh mihring tana remchang tura ngaih a ni.
Hei mai bakah hian Mars leh hmun danga boruak lawng kah chhuahte ten chawlh leh châk lakna atan a remchang thei dawn bawk niin an ngai.
Nilaini tlaia a tum dawn khan boruak a tanghle a, lander hi second khatah km 1.68-a chaka a thlawk chu zero dawnah tihmuan a ni a, hei hi him taka a tum theih nana tih a ni.
Hlawhtlinna chan hi India chuan ram pumah a lawm a, Prime Minister Narendra Modi pawhin, “Tunah chuan India chu thlaah a awm ta,” a ti a. “Tute ram mahin an tih theih loh kan hlen ta,” a ti bawk.
Thla chhim tawpa India a tum hma lawk hian Russia-in a kah chhuah Luna-25 chuan a tum khalh hman tep a; mahse, vir buaiin thlaah hian a tla a ni.
India-in thlaa inkah kai a tum vawi hnihna, kum 2019-a a tum khan a hlawhchham a, a lander leh rover chu a tumnaah a insawh chhia a, a orbiter erawh a la dam a, tun thlengin thla a la hel a, Vikram lander pawhin a hnenah thlalak thawnin chu chu leiah a thawn leh chhawng dawn.
India chauh hi thla chhim tawp thlithlaitu a ni lo va, khawvel ram dangte pawhin tum tumna an nei nual a. Scientist-te chuan thla hi chiang taka hriat bel a nih thei chuan vanthengreng zau zawk kalka atana hman theih dawn niin an ngai a ni.