Aizawl : MNYF Vice President Zodinpuia chuan Mizoram tan an party chuan theihtawp a chhuah zel dawn tih sawiin, “Kalphung thar tlangaupuitute beidawnga an tawp hunah pawh MNF chu Mizoram leh Zofate te tan nghet takin a la kal zel dawn,” a ti.
Nimin khan MNF Thalai Hqrs., rorelna sang Extended Meeting chu Mizo Hnam Run-ah neih a ni. He huna thu sawitu Zodinpuia chuan, Mizo thalaite’n hmasawn tuma nasa taka hna an thawh lai hian, damkhaw chhuahna tura pawimawh hmasa ber ‘Mizo Nationalism’ tlansan a hlauhawm hle a, thil dang zawng zawng aiin ram leh hnam, sakhaw himna hi dah pawimawh hmasa ber a tul tih a sawi.
MNF chuan rinawmna an vawng reng tur a ni tih sawiin Zodinpuia chuan, “Kohhran mipuite pawhin mahni awmna kohhrana rinawm lote chu sakhaw rawngbawltu atan kan duh lo a, hetiang chiah hian politics-ah pawh mi rinawm lote chu ram kaihruai turin mipuite’n kan la hnualsuat zel a ni,” a ti bawk.
MNF Thalai hruaitu kalkhawm chuan, ‘Kum 2023 Mizoram inthlanpui lo awm turah MNF-in rorelna a chan leh ngei theih nan theihtawp chhuah ni se,’ an ti a. Kumin September thla atangin Mizoram pum huapa Mizo Nationalism campaign beihpui kalpui turin ruahmanna an siam a. Resolution pathum an pass bawk.
MNYF Extended Meeting resolution:
- Zofate inpumkhatna tur leh tanpui an ngaih hunah pawh huaisen taka kan unaute hmaa ding thin Chief Minister Zoramthanga leh a kaihhruai MNF-in Mizoram ah sorkarna a chan leh ngei theih nan theihtawp kan chhuah dawn a ni.
- Kan ram leh hnam himna tibuai thei tur zawnga sorkar laipui hmalakna hrang hrangte MNF sorkar-in huaisen taka a dodal thin hi lawmawm kan ti a. Hei hian MNF chu Mizoram himna lungphum pawimawh ber a nihzia a tarlang a ni.
- Forest Conservation (Amendment) Act, 2023 dodalna Resolution, huaisen taka Mizoram Assembly House ah pass a ni hi lawmawm kan ti a. Mizoram hmasawnna leh a himna tura thawk turin MNF aia tha an awm lo, tih a rawn lang chiang chho zel hi lawmawm kan ti.