Aizawl : MPCC President Lalsawta chuan pianphunga rualbanlote enkawl that an pawimawh tih a sawi a. Rualbanlote tana zirna sikul leh infrastructure tha neih a pawimawh thu a sawi.
Ningani khan MPCC hruaitute’n an president hoin Aizawl Republic venga pianphunga rualbanlote sikul Shining Star Special School an tlawh a. Zirtirtute leh naupangte nu leh pa te nena an inkawmnaah Lalsawta chuan, mihringte hian an chungah thuneihna an nei lo a. An pian danah pawh Pathian thu thua siam leh awm an ni a. Pathian mit hmuhah chuan ang khat leh thuhmun vek an ni a, danglamna an awm lo tih a sawi a. Rualban lote enkawl that an pawimawh thu leh an tana zirna sikul leh hmanraw changtlung zawka enkawl an pawimawh tih a sawi.
MPCC Treasurer, Dr. Lalmalsawma Nghaka pawhin thusawiin, rualban lote enkawlna hmun leh zirna sikul Mizoramin a mamawh bakah, social Security tha tak neih a tul tih a sawi a. “Chhungkaw tam tak tan inenkawl a harsa a, rilru leh taksa enkawl chungchangah nu leh pa, zirtirtute tan a hautak hle,” tih sawiin, rualban lote enkawl that chuan mahni ke a ding a, intodelh a, eizawng thei khawpa chher theih an nih thu a sawi bawk.
Shining Star Special School, Republic Veng, Aizawla mi hi mi tlawmngai intelkhawm ‘Society For Rehabilitation for Persons with Disabilities’ te’n an din a. Tunah hian zirlai naupang 32 awm mekin, zirtirtu paruk an awm mek a ni.