Mizoram State Animal Welfare Board (SAWB) leh a thawhpuiten dan hnuaiah ui chu ran talh phal zingah a tel tawh loh avangin Uisa Zuar Association (UZA)-te registration tihtawpsak turin hma an la a, Aizawl UZA hnenah zuar tawh lo turin an hriattir.
SAWB leh ran humhimna dan hrang hrang kenkawh a nih theih nana hma latu, JB Foundation, Zemabawk tangkawp chuan Registrar of Firms & Societies hnenah UZA-te registration chu cancel turin an ngen a, lehkha an thehluhah chuan, “The Mizoram Animal Slaughter (Amendment) Act 2020-in ui chu ran talh phal zingah a paih tawh avangin Firms & Societies hnuaia registration an neih mek chu dan kalh a ni tawh,” an ti a; hemi avang hian UZA-in registration an neih mek chu cancel turin an ngen tih an tar lang.
JB Foundation chuan August 23, 2023 khan Aizawl UZA president lehkha thawn bawkin, danin a humhalh tlat ui talh leh a zawrh hmanga eizawn chu a rem tawh lo tih hriattirin, hemi chungchang hi a rang thei ang bera association member-te hrilha an signboard tarte pawh la thla turin a ngen a, dan bawhchhetute lakah dan ang takin action lak thin a nih thu an ngenna lehkhaah chuan an tar lang a ni.
JB Foundation hian lirthei association hrang hrang – Pickup Owners’ & Drivers’ Association, Mizoram Maxi Cab Owners’ Association, Aizawl Two Wheeler Taxi Association, Mizoram Rick Shaw Association, All Mizoram Drivers’ Union, Mizoram Truck Drivers’ Association leh Mizoram Taxi Association president theuhte lehkha thawn bawkin ui talh tur phurh chu danin a phal lo tihte, phur tawh lo tura an ngen thute an tar lang.
Danin ui talh tur a phal loh chungchanga dan bawhchhiate mana hma la tur hian Superintendent of Police, Aizawl District, Aizawl Traffic SP leh transport department director te chu lehkhathawn hmangin a hriattir bawk.
Hetihlai hian Aizawl UZA hruaitute erawh uisa zuar tawh lo tur emaw, an dawr sign board te la thla tur emawa hriattirna chu sorkar atangin an la dawng lo tih an sawi a, uisa zawrh tawh loh chungchanga hmalaknate chu an ral hriat chauh tih an sawi.
Aizawl UZA hruaitute chuan June thla chawhnu lama SAWB thukhawmin an eizawnna nghawng tur chungchang a rel hnu khan vety minister chu hmuin Firms & Societies hnuaia inziak lut an nih thu te, an eizawnna tihtawp a nih loh nana hma laksak turin an lo ngen tawh tih an sawi.
Hemi chungchangah hian chief minister pawh hmuh thuai an tum thu sawi bawkin, kar hmasa lam khan hmuh tum mah se a zin avangin a rem lo a, tun hnaiah hmuh leh thuai an tum a, an eizawnna titawp zawnga hmalakna awm chu titawp turin sorkar hotute na taka ngen an tum thu an sawi a ni.