Premier League club Wolverhampton Wanderers chuan Manchester City hnen atanga Pound maktaduai 47 a Portugal midfielder Matheus Nunes lei dilna chu an hnawl.
Wolves hian kum 24 mi hi nikum khan an club chanchin a player manto ber ni turin Pound maktaduai 38 in Sporting Lisbon atangin an lalut a. Kum nga contract an hnenah a ziak.
City hian an midfielder rinrawl Kevin de Bruyne chu inhliam avangin thla li vel tal an chhawr thei dawn lova, hei vang hian midfield a khel tur duhthlan tur neih belh an duh.
West Ham United a khel Lucas Paqueta chu an ngaihven a, kum 25 mi Brazilian hi manto takin lei an dil tawh. Nimahsela Football Association in pawisa inchawina lama dan a bawhchhiat avangin an chhui dawn a, hei vang hian City in midang an melh. Crystal Palace winger Eberechi Eze nen pawh sawizawm an ni.
Wolves hian an player pawimawh hi tun nipui a player bazar a an chet hleihtheih loh hnuah chan an duh lova, nimahsela manto zawka City in an dawr chuan an tang rei thei ang em tih zawhna a awm. Player thar lakluh nan sum hmuh an mamawh ve bawk avangin City in lakluh theih an inbeisei hle.