Zoram People’s Movement (ZPM) chuan nimin khan kum 2023 inthlanpui lo awm tur atan campaign khuhhawnna Vana pa Hall-ah an nei a, he hunah ZPM Chief Ministerial candidate Lalduhoma chuan mihring lam inbuatsaihnaah chuan an inbuatsaih fel thawkhat tawh niin a sawi.
ZPM Leader Lalduhoma chuan ZPM chu sorkar se ti lote pawhin an sorkar an rinpui tih a sawi a. Pathian leh mipui zarah sorkarna an chang a, kalphung thar budget an pharh ve thei a nih chuan an tih tur chu Zoram mipui hnenah langtlang budget chhiarkawp dik phochhuah an tum dawn nia sawiin, “Tuna kan kalphungah hi chuan budget session kan han nei a, budget kan han pass a, mipui kan bum a, keimahni pawh kan inbum a ni,” a ti.
Mizoram budget pass takah kumina bat ngai tura chhut chu Rs vbc 13,584 a ni a. Puk belh tura dah chu Rs vbc 2,479 a nih thu sawiin Lalduhoma chuan, “Chumi belhkhawm chu chhungkaw nuai hnih leh sing thum awm angah inngai ta ila, chhung tinin nuai sarih thlengin kan inchankim thei tawk chiah a ni,” a ti a. Kumin Mizoramin a rulh tur hi Rs vbc 1,442 a ni a, a pung rulh tel tur hi Rs vbc 662 a ni. Kumin chhunga lei bat sa rulh tur zat hi, Mizoramin sum a lakluh ve aiin Rs vbc 123-in a tam zawk niin a sawi.
Hetiang zat leiba chhawm tur ni chungin ZPM chuan an sorkar anih chuan, a kum khatna atangin kut hnathawktute, kha leh chen kawng lo kham thlawn tawh, kut lo durh thlawn tawh, thlan lo far thlawn tawhte chu sum neih ang angin an tuam hlawm dawn niin a sawi a. Thlai thar pali an lei tur leh a rate nen an puang tawh tih sawiin, “Hei bakah hian buhhum kan lei dan tur te, kuhva te, sangha te, rubber plantation, alu te leh thil hrang hrang te hi thlai pali anga a rate siamsaa puan lawk ang em ni lo mah se, vegetable supply chain-te nen contract farming a kalpui chhoh zel kan tum a, a tahtawla hmalak chhoh zel kan tum a ni,” a ti bawk.
ZPM President Lalliansawta pawhin MLA inthlan atan an inbuatsaihnaah party tana thawktu leh candidate zawng zawngten Lalpa tih chunga campaign tura chahin, Mizoramah kalphung thar mipui sorkar a pian theih nan MLA inthlanpui lo awm turah theihtawp chhuah turin party mite a chah bawk.
ZPM Campaign khuhhawnnah inkhawmah hian an president Lalliansawta chuan an party-ah Minister hlui KS Thanga leh ZPM zawm thar eng emaw zat a lawm lut nghal a ni.