United States-a Louisiana state chu Hurricane Ida-in Gulf of Mexico atanga a hnaih zel avangin hmun him lam panin mi sang tel an tlanchhe mek.
Ida hi category four hurricane a ni tawh a, a chak ber aiin level khat chauhva hniam ni tawhin thlipui pawh darkar khata km 225-a chak thlengin a keng dawn.
Pathianni zan (India-a Thawhtanni chawhma) hian khawmual a kai dawn a, mihring nunna atana hlauhawm khawp a ni dawn tih sawi lawk a ni a. Kum 2005-a nasa taka New Orleans sawptu, Hurricane Katrina aiin a na dawn.
Hmun him lama insuan chhuak an tam avangin kawngpui lianah chuan lirthei inhnawh tawta tang an tam hle.
National Hurricane Center chuan ‘a hmahruaiah thlipui na tak leh tui tilian thei ruah tam tak chu Gulf vaukam hmar lamah Pathianni tuk atangin a thleng ang’ tih an sawi.
Governor John Bel Edwards chuan an thil hmachhawn tur chu kum 150 zet hnua a na ber a nih theih thu a sawi a. “Inkhar hun a ni e,” tiin Inrinni khan a khua leh tuite chu a vaukhan lawk.
“I muthmunah inring la, naktukah hian rang takin kan khaw awm dan chhia hi a lo thleng thut dawn a ni,” a ti.
An thenawm, Mississippi governor pawhin emergency a puang.
President Joe Biden chuan Ida hi ‘hlauhawm takah a insiam’ tia sawiin a sorkar chu puih ngaite puih turin a inpeih tih a sawi bawk.
NHC chuan India-a Pathianni chawhnu dar 2:30 khan Ida hi Mississippi luipui hnar atanga chhim lam mel 75 chuangah a awm a, hmarthlang lam hawiin darkar khata mel 15 chuanga chakin a kal mek tih an sawi a. Tuipuia a awm lai hian a insiam lianin a chak telh telh niin an sawi bawk.