India-a Prime Minister Narendra Modi-a sorkarin G20 Summit a thlen tura president hminga mi pawimawhte a sawmna lehkhaah ‘Bharat’ tih hman a ni chuan inhnialna a siam nasa hle.
Bharat hi India sawi nana Hindi-a hman thin a ni.
President Droupadi Murmu-i’n ram dang hruaitute zanriah kilpui tura a sawmnaah hian amah chu ‘President of Bharat’ tiin dah a ni.
Rorel lai, BJP party-a minister eng emaw zat chuan he thil hi lawmawm an tih a, eptute erawh chuan engvanga hetianga ti nge tih an zawt nasa hle.
Hetianga president hminga sawmna pek chhuah a nih mek lai hian India ram hming hi Bharat tia thlak tumna a awm tih sawi rik lai tak a ni a; mahse, hming thlak hi engmah tihchianna a la awm rih lo.
India-a sorkar website zawng zawngin ‘government of India’ tih la hmangin Murmu-i ngei pawh President of India tiin X-ah a la indah tho.
Ni hnih lek liam taah khan BJP kal dana kaihruaitu ber pakhat, Rashtriya Swayamsevak Sangh (RSS) chief Mohan Bhagwat chuan India chu India ti lovin Bharat tih zawk tur a nih thu a lo sawi tawh.
“India tia kan sawi hian sap tawng hmang chuan an hrethiam nghal ang; mahse, hei hi kan ti tawh tur a ni lo. Ram hming, Bharat hi khawvel khawi hmuna kal pawhin Bharat tih zel tur a ni,” tiin Bhagwat-a hian a sawi.
Thawhlehni sawmna sem chhuaha tar lan a nih dan hi BJP politician-te chuan tha an ti a, ram tan hun ropui tak a nih thu an sawi.
“Kan hmasawnna kal zelin Amrit Kaal lam a pan hi a lawmawmin a chhuanawm a ni,” tiin Assam Chief Minister Himanta Biswa Sarma chuan X-ah a tar lang.
Amrit Kaal hi ‘hun rangkachak’ tia sawi theih a ni a, prime minister leh sorkar mi pawimawh dangten kum 2047-a India-in kum 100 a thlen hmaa ramin hmasawnna chak tak a neih sawina atana an hman a ni a. Hetih hunah hi chuan India hi khawvela ram thangduang ber zinga mi niin ram changkang a ni tawh dawn niin an sawi.
Eptu hruaitu tam tak erawh chuan Bharat tih hman leh BJP hruaituten an sawi zui dan chu na takin an duh loh thu an sawi a. Hetianga sawitu tam ber hi tun hnaia eptu tangrual indin thar, Indian National Developmental Inclusive Alliance (INDIA)-a telte an ni.
Bihar-a Rashtriya Janata Dal party hruaitu, Manoj Jha chuan, “Kan tanrualna hming atan INDIA tih kan hman hnu lawkah BJP hian sawmnaah ‘Republic of India’ tih aiah ‘Republic of Bharat’ an rawn hmang,” tiin X-ah a tar lang.
“Keimahni atang hian India emaw, Bharat tih emaw lak theihna in nei lo,” a ti bawk.
Tun chauh hi India-in G20 kaihhnawihah Bharat a hman vawi khatna a ni lo va. Handbook a siam, ram dang atanga palaite puala siamah pawh ‘Bharat, The Mother Of Democracy’ tih hman a ni.
Indian Danpuiah hian India hi Bharat tia dah a ni tel a, Article 1-ah chuan ‘India, that is Bharat, shall be a Union of States’ tia dah niin hei chauh hi hman a ni ve thung.
A bak hmun dang zawng zawngah chuan Danpuiah hian India tih velin ram hi sawi a ni.
Tun hma khan Supreme Court-ah pawh India hming hi Bharat tia thlak tura petition thehluh a lo awm tawh a; mahse, judge-te chuan inhnialna siam an duh lo va, dilna thehluttu hnenah chuan sorkar hnenah a dilna chu thlen zawk turin an ti a ni.
Judge tlem azawng chuan he thil hi an sawi zui ve a; mahse, hengte hi dan ang taka sawi an ni lem lo hlawm.
Chief Justice of India hlui, Sharad Bobde chuan, “India hi Danpuiah Bharat tia sawi sa a ni tawh,” a lo ti tawh a. Chief justice hlui tho, TS Thakur a sawi dan leh koh dan hi chu khua leh tuiten an duh thlan angin, India tih leh Bharat ti pawhin an ko ve ve thei tih a lo sawi tawh.
India hian kuminah hian G20 Summit a thleng dawn a, September 9-10 hian an khawpui, Delhi-ah neih a ni ang.
G20-ah hian khawvel ram hausa 19 leh European Union an tel a. India hian a member ramte inchelh chhawk thin president nihna chu a chelh mek a ni.