Sipaia a tan laia firfiak pawl, Hizbul Mujahideen zawmtu chu nimina Jammu & Kashmir, Shopian-a inkahnaah kah hlum tel ve a nih thu police-ten an sawi.
Kashmir chhim lam, Zainapora-ah firfiak tawm an awm tih thu an dawn bawhzuiin nimin khawvar hma atang khan venhim hna thawktuten beihpui an thlak a. He chanchin ziah lai thleng hian helho tawmnaah hian inkahna a la awm zui reng.
Police-te chuan heng hel tawmte hi Hizbul Mujahideen an nih thu leh firfiaka chetna hrang hrangah an lo inhnamhnawih tawh tih an sawi a, civil mite pawhin an chetna hi an tuar fo niin an sawi a. Nimin tlai thleng kha chuan sipai lamah thi an la awm lo.
Hel an kah hlum zingah hian Idrees Sultan a tel ve a, ani hi Shopian-a cheng niin kum 20 pel awrh chauh a ni a. Jammu & Kashmir Light Infantry regiment-a a tan hnuah kumin April khan firfiak pawl hi a zawm niin police-te chuan an sawi a. Idrees Sultan hi Chota Abrar ti pawhin an ko thin a, a rual hian Shopian-a cheng tho, Amir Hussain Rather pawh an kap hlum tel a ni.
Inkahna a la awm reng avang hian police-te chuan civil mite awm hnai lo turin an ti.