Prime Minister Narendra Modi chuan nimin khan Asia chhimchhaka a hmasa ber tur, ram pahnih inrina kâna petroleum pipeline hmasa, India leh Nepal ramri kântu chu a hawng a. Motihari-Amlekhganj pipeline hi ram hnihte inpawhzia tilangtu a nih thu a sawi.
Rs Vbc 3.5 senna tura ruahman, he tuialhthei inpekchhawnna tur siamna tur hi kum 1996 daih tawh khan sawi rik a ni tawh a; mahse, Prime Minister Modi-an kum 2014-a Nepal a tlawh khan tihfel chauh a ni a. Modi leh Nepal premier KP Sharma Oli chuan nikuma Oli-an India a lo tlawh tum khan Hyderabad House, New Delhi-ah lung an phum dun a ni.
“Asia chhimchhak lama ramri kâna petroleum pipeline chu hun tiam aia hma daihah zawh hman a ni a, hei hian thawktute inpekna a tilang a. Zawh hun tura ruahman aiin a chanve zeta zawh hma a ni,” tiin Modi hian a hawnnaah hian a sawi a. Modi hian Nepal hruaitute pawh fakin an sorkar nena an thawhhonaah lawm thu a hrilh a ni.
Prime Minister chuan India hian Himalayan tlangdunga ram awm hi hma a sawn theih nan pui turin a inpeih reng tih a sawi a. “Kum 2015-a lirnghing rapthlak tak a tawrh hnuah Nepal hi a indin thar leh mek a, India chu thenawm ram hi a theih ang anga pui turin a inhuam a, kan inkawmngeih a. Nepal-a Gorkha leh Nuwakot district-a chenna tur in kan sa dun thei pawh kan lawm hle a ni,” a ti.
Motihari-Amlekhganj pipeline hi ruahman ang chuan kumin April thlaa hman theih tura ngaih a ni a; mahse, Nepal-a Parsa National Park huam chhunga thing kih phalna hmun mai theih a nih loh avangin hna a khaihlak a, chhunzawm a nih leh hnuah rin aia hmain zawh a ni ta thung a ni.