Aizawl : Mizoram Ex-Services Leaque-in Inrinni-a General Assembly vawi 34-na an hman chu Home Minister Lalchamliana’n khuallian niin a hman pui.
Vana pa hall-a Mizoram Ex-Services League-in khawmpui an hmana khuallian Lalchamliana chuan, Mizoram sorkarin Ex-Service te chu a duhsak thu leh, Police an lak turah pawh seat zaa 5 a hauhsak thu te, Home Gourd atanga Police a lut turte tan pawh sorkar chuan ngaihtuahna thui tak sen tawh laiin, Covid-19 hripuiin harsatna a siam sak thu a sawi a. Sorkarin hei hi tihlawhtling turin hmalakna a kalpui mek thu a sawi.
Home Minister chuan, “Sipai tan hi mahni, chhungkua leh khawtlang tan thil tha a ni,” a ti a. “Sipaite hi ram leh hnam humhimtu an nihna piah lamah chhungkaw chawmtu leh khawtlang tan mi tangkai an ni a. Mizo zinga IAS leh sorkar hna lian dang thawk zingah sipai fa an tam hle a ni,” a ti bawk.
General Assembly hi chawhma leh chawhnu hnua then niin, chawhma hun hi Lt. Col. ZS Zuala, Sr. Vice President in a kaihruai a. Secretary leh Treasurer report ngaihthlak a ni a. President Lt. Col. Clement Lalhmingthanga leh SW&R Director Surg. Lt. Cdr. Lalnuntluanga te’n thu an sawi bawk.
Chawhnu lamah rorel inkhawm neih a ni a. Rorel inkhawma an ngaihtuah zinga pakhat, ‘Mizoram sorkar hnalaknaa Ex-Servicemen te Reservation chungchang’ tih chu High Court-ah petition theh luha kalpui an rel.