Jammu & Kashmir police-te chuan Sopore-a mipuite rilru a dik lo zawnga hruai kawi tuma hma latu nia an hriat, poster tara thu dang chhiar turte pawh tichhuaktu, Lashkar-i-Taiba firfiak pawla tel bawk mi pariat chu nimin khan an man.
An mi mante hi Aijaz Mir, Omar Mir, Tawseef Najar, Imitiyaz Najar, Omar Akbar, Faizan Latief, Danish Habib leh Showkat Ahmad Mir te an ni a. Heng mite hi tualchhunga firfiak hlauhawm tak, Sajad Mir, Haidar tia koh bawk leh a thuihhruai, Muddasir Pandith leh Asif Maqbool Bhat te chu hetianga poster tara mite chhiar tur thu dangte pawh vawrh darhtu hi nia sawi a ni. Heng mi 3-te pawh hi LeT mi leh sa tho an ni.
Police chuan an mi mante atang hian computer bakah an thu thehdarh tur an ziahna te, poster an siamna te pawh an man tel bawk.
Police hian he lai bawr vel thova tun hnaia civil mi thattu firfiak pawlte an la chhui zui mek bawk.