Aizawl : Manipur tualchhung buai avanga harsatna tawk mek Zofate tanpuina’n Tripura Central Young Kaipeng Association (CYKA) leh Mizoram Kaipeng Welfare ten Central YMA kaltlangin Inrinni khan Rs. 1,00,000 an hlan.
Tuikhuahtlanga Central YMA pisa-ah Central YMA aiawhin General Secretary Prof. Lalnuntluanga leh Treasurer Fabian Lalfakawma te’n tanpuina an lo dawng a ni.
Tanpuina inhlanah Kaipeng hnam hruaitute chuan, “Manipura kan unau Zofate tawrhna chu kan hriatpui a, pawi kan ti hle a, kan theih ang tawk a tanpui zel kan tum a ni,” tiin, an unaute chunga Manipur sorkar hmalak danah an lungawi loh thu leh, rorelna dik an pek ngei theih nan Tripura lama pawh an theih angin hma an lak zel tur thu an sawi.
Central YMA GS Prof. Lalnuntluanga pawhin thu sawiin, “Vawiina Manipur Zofate tana in thil rawn tih hian unau kan ni tih leh thisen a inzawm kan ni tih a entir a. Zo hnam inpumkhatna a thlen ngei ka ring tlat a ni,” a ti.
Zofate hi koh dan hrang hranga koh an ni tih sawiin Prof Lalnuntluanga chuan, Kuki tih te, Chin tih te, Mizo tih te, Zo tih tea koh ni mah se, miin an koh danah buai tur a nih loh thu a sawi a. “Eng ang pawhin min ko se unau vek kan ni tho a ni. Keimahni identity theuh kan vawn nun a ngai a. Kaipeng pawhin Kaipeng hnam tawng hi ti nung tha mai ila, tawng hrang hrang kan nei te hi kan hnam min tihausa tu leh hnam ropui kan nihna ti lang tu zel a ni,” tia sawiin, hnam inpumkhatna atan intanpui tawn a pawimawh thu a sawi bawk.
He huna hian Tripura Central Young Kaipeng Association (CYKA) leh Mizoram Kaipeng Welfare hruaitute aiawh thahnem tak an tel a, Central YMA OB leh CEC member thenkhat an tel bawk a ni.