July thla atang khan India ram hmun hrang hrangah mit na hri ‘conjunctivitis’ a leng a, he hri leng hian Mizoram chu August thla chanve vel atang khan a tibuai tan a, mit na hri kai damdawi in pantu an thahnem thei hle.
Health department hotuten The Zozam Times an hrilh danin mit na hri kai hi August thla chanve vel atang khan an tam tan a, ni tina Civil Hospital, Aizawl Eye OPD pantu zinga za zela 50 vel chu mitna an ni.
August thla khan Mizoramah mit na hri kai sorkar damdawi in pan mi 2,059 an awm a. Health department chhinchhiahna atanga a lan danin Aizawlah mitna hri kai an tam zual a, August thlaa Aizawl chhunga sorkar damdawi ina mit na hri kai enkawl chu an vaiin mi 1,574 an awm a. District dangah pawh mit na hri kai hi awm mah se an tam lutuk lo thung.
Mit na hri leng hian reh lam a la pan lo mai ni loin kai hi an pung zel emaw tih theih a ni a. Kar kalta Nilaini khan Civil Hospital, Aizawl Eye OPD pantu mi 229 an awm a, an zinga mi 140 chu an mit a nat avanga damdawi in pan an ni a. A tuk Ninganiah OPD pantu mi 157 zinga 97 chu mit na hri kai niin, Zirtawpniah pawh OPD pantu mi 200 zinga 150 chu mit na hri kai an ni.
Conjunctivitis hi taksa insik atanga inkai darh a ni a. Heng avang hian la inveng thiam lo naupang zingah an inkai darh nasa zual a. Aizawl khawpui chhunga zirna in thenkhatte chu mit na hri kai an tam avanga ni hnih kharte pawh an awm.
Health department hotute chuan mit na hri kaite chu an mit a sen a, men a nuam lo a, mitte a thak thin tih sawiin, hetianga awmte chuan damdawi in pan vat thei se an duh thu a sawi a, mahni thua damdawi inchawh ve ngawt a him lo a, he hri inkaina chu in-contact-in a nih avangin kut silai uluk a tul thu leh pawn chhuah tam loh a that thu a sawi a ni.