Kumin MLA inthlanpui lo awm turah political party hrang hrangin assembly constituency 40-a an candidate tur an tichiang mek zel a. Rorel lai party, MNF pawhin bial 40-ah bial 38 tifel tawhin, bial awl pahnih an la nei nia hriat a ni.
Inrinnia MNF Nomination Committee thukhawm chuan MLA inthlan an hmachhawn tura an party aiawha ding tur chungchang ngaihtuahin an sawi ho a. Constituency 40-ah bial pahnih chauh chin fel loh an la nei nia hriat a ni a. Heng bial pahnihte hi Aizawl South II leh Chalfilh nia sawi a ni.
MNF-in candidate tur an la tihfel lohna nia sawi, Aizawl South II hi ZPM MLA Lalchhuanthanga bial a ni a. Chalfilh bial hi Assembly Speaker Lalrinliana Sailo, MNF, bial niin tun tumah hian MNF ticket-in a ding nawn dawn em tih hriat a ni ta lo.
Kumin MLA inthlanpui lo awm turah rorel lai party hian bial pathum – Tawi, Aizawl East II leh Hrangturzo bialte tel lovin an MLA ding laite chu an bial ngaiah ding leh vek tura ngaih an ni a. Aizawl East II bialtu, Robert Romawia Royte chu Hachhek biala ding tura tihfel a ni tawh a. A chhuahsan tur bialah AMC Executive Corporator B Lalawmpuii ding tura ngaih a ni a. Hrangturzo bialtu MLA ni lai, Home Minister Lalchamliana pawh din a tum tawh loh avangin a hmun ruak hnawh khat turin MNYF vice president hlui, Lalremruata Chhangte ruat nia sawi a ni.
Hei bakah, Tawi bialtu MLA ni mek, P&E Minister R Lalzirliana pawhin a bial hi a sawn dawn nia hriat a ni a. MLA bial an neih lohna, Aizawl North I-a ding tura ngaih niin a bial chhuahsan turah Aizawl Mayor Lalrinenga Sailo a chiang tawh a. MLA an neih lohna bial, Palak pawh Indian National Congress (INC) MLA ni mek, KT Rokhaw chiangah ngaih a ni bawk.
Hetih lai hian Siaha bialtu MLA Dr K Beichhua chu MNF party a chhuahsan avangin MLA bial an neih lohnaa chhiar tel a ni ta a, he bialah hian HC Lalmalsawma Zasai a din tur thu a chiang tawh.
MNF hian MLA bial an neih lohnaa ding tura an tihfel tawhte chu Aizawl North II-ah Vanlalsawma, Aizawl West III-ah Adviser to CM ni mek Er K Lalsawmvela, Aizawl South I-ah K Vanlalvena, Serchhip-ah J. Malsawmzuala Vanchhawng, Thorang bialah Er Rohmingliana, West Tuipuiah Proba-i, Tuichawngah DD Chakma, Lawngtlai West-ah V. Zirsanga te tihchian an ni tawh bawk.