- Lallunghnema, Charity Lodge
Consumer Protection Act 2019 hi India ram pum puiah hian mi tam takin an chhawr tangkai tawh a. Mi tam takin a awm tih pawh an hre lo thung! Mizoramah pawh hian he Act hian pawimawhna a nei lian tual tual a.Consumer-ten an tangkaipui hle ta bawk a ni. India ram hmun dang ang bawkin Mizoramah hian he Act hi a awm tih pawh hre lo sing tam tak an awm mek thung a ni.
Kan hriat nawn fo tur chu Consumer Commission hnen thleng kher lo hian complaint tam tak a chin fel theih a ni, tih hi! Consumer Commission hnen thlen kher a tul lo e, kan ti a nih chu.Ukil rawih pawh intih hmuh loh hram a tha e,kan ti bawk. Consumer Activist zingah hian pun tur an awm reng tih hriat a tha âwm e.
Chuvangin consumer pawl leh activist-te nena lan lungawi lohnate tih fel zel hi a fin thlak em em a.Tun thleng hian complaint tam tak chu chinfel chhoh mek zel a ni.Kan thil tihah hian kan chiang a,kan zam lova,thil dikah leh mi dang lawmna turah chuan kan kal miah miah zel mai dawn a ni.
Mizorama State Commission leh District Consumer Commission-te hi thuam chak a, hna thawk thei tura buatsaih a ngai chho zel a. Sawrkar hian tha hnem ngai taka a umzui a, a vil a tul a ni. Sawrkar chuan sum fai tam tak sengin State leh District levelahte chuan Consumer Disputes Redressal Commission a din a.
Heng Commission-a President leh Member- te hlawh bakah eng emaw neuh neuh atan pawisa a ni thin a. Heng Commission-a staff hlawh pawh hi tam tham tak a ni a. Thla tin nuai eng emaw zat hman a ni thin.Chuvangin heng Consumer Commission-te hi hmang tangkai turin kan infuih a ni. Hetih laia consumer case ngaihtuah tur a awm mang loh chuan sawrkar chu a inseng thlawn mai mai dawn a ni. Chuvangin keini thil leitu leh hmangtu(consumer) hian tlan chhe mai mai lovin tha hnem ngai takin complaint theh lut thin ang u, tiin kan infuih a ni.
Sawi leh sawi hnu, Consumer Commission tha tichak tur chuan consumer right awareness neih tam a pawimawh hle a. Awareness tha tak nei tur chuan consumer thenkhat harsatnate buaipuia,an hlawhtlinna te chu puanzar thin tur a ni.
Zep thu a chang law, awareness kan tlak chham avanga pawisa kan hloh hi a nasa hle a.Consumer-te tuarna hi a namen lo hle a ni.Chuvangin consumer-te tuarna hi Consumer Activist-te chuan kan hriatpui a tul a,harsatna tawkte lakah kan tlan chhe tur a ni hek lo.
Nitin, tuktin, tlaitin,zantin hian thil zuartute chuan an thil zawrhte chu an hralh mawlh mawlh a. Sumdawng lian ten an company item-te chu an agent te hnenah an pe chhuak ve mek zel a. Inter-net hmanga sumdawng inti tam tak pawhin delivery tawngkam thlum tak hmangin an inzuar chhuak ve reng bawk.
Hetih mek lai hian dawr nei miah lo, bungrua pawh nei lo, hmel hriat loh leh hmel hriat lohte chu an lo inbum ve char char bawk a. Heng inbumna thanga awk thenkhat tawngkam hi lo ngaithla ve teh.
“Ka pu, hei kan thiante’n lo va be pawp ve mai rawh min tia, ba chungchangah min buaipuisak thei an tia, tihngaihna ka hre si lo a, ka lo be ve tawp mai che.
Kei chuan, ” Chiang deuh takin han sawi ula, in address, harsatna in tawh dan”etc.
Min betu, “Nikum July 2022 thla khan Tetei Khawlhring hian China bungrua ka chahsak thei che, a ti a. Tichuan, kan inchah fel a, pawisa pek lawk a ngai a ti a. Ka pe lawk vek a. Tun thleng hian bungrua thleng tur pawh a awm lo, bakah ka phone call a chhang duh tawh lo hrim hrim a.
Thawmhnaw leh pheikhawk bale ka chah nual a. Min sawi hmuh danah a tlawm si a. A lo thleng tep ti rengin thla thum vel min nghahtir a, kawngah buaina a awm a ti a. Khawi chin nge a thlen tawh tal min hrilh la, ka ti a, a sawi thei bawk si lova. Chumi hnuah a sum faiin ka kir ang che, a ti leh a. Kar lehah a ti reng chungin min pek tak tak tum si loin a sawi buai zel a, a hnuah phei chuan phone call a la duh tawh lo thu chhut ang angin ka rawn chhawp chhuak a ni e-llh).
An inbum chiang hle a. Hetiang thil thleng hi buaipui tur a awm deuh reng mai! Phone block a awm chuan tihngaihna a awm tawh lo tluk a ni. Dawr nei si lo, bungrua nei si lo. Mi pawisa dil ching, Sap tawng kawi khat bak hre lo hian ,’Delivery’ tawngkam lah hi an uar em em mai a. Ka sawi tum ber leh ka chah duh ber che u, chu, ‘hre chiang lova,advance-a pawisa inpek hi sim teh u, tih hi. Hetiang chi hi chuan mi an bum tlangpui! an biak tlang theih thin loh avangin puih ngaihna a awm lo a ni ber.
Kan thupuiah kan lut tawh ang:
Tun tum chu engnge ka ziah ang tih ka inngaihtuah laiin ka rilruah kan nau,kan thianpa Pu Dinpuia of Serchhip lehkhabu tha tak ,’ Mipui Chanpual,: a lo lut a.He bua mi hi ka chhu chhuak mai dawn a mi aw! ka tih mai mai laiin The Economic Times (5.Sept.2023) ka kheuh chhuak nawlh mai a.Ka lawm hle!
Tin, he Economic Times hi ka han vhhiar a,consumerte tana chanvhin lawmawm ka hmu ta a ni.
He Sap tawng chanchinbuin a tarlan danin ICICI Bank chu, an customer document an tihbosak avangin Rs. 25 lakh chawitir a ni,tih hi a lo lang kup mai a. Complaint hi Consumer Commission hnenah hian vaipa, Manoj Madhusudhavan chuan Lawyer pakhat, a hming Swetank Shantanu ruaiin a khing ta a. (Consumer Commission-ah hian tun hma chuan Ukil rawih phal a ni lova. Mahse, tunah chuan Ukil rawih phal a ni tawh a-llh) Consumer Commissiona complaint thehlut tur apiangin Ukil rawih tur tihna erawh a ni lo, tih hriat tur a ni. Ukil rawih hi a hautak a, activist emaw consumer organisation hruaitute rawih mai tur a ni.
Complaint-in hnen atanga thu dawn danin Bangalore-a inbun ICICI Bank hian Manoj-a hnenah hian Housing loan Rs. 2.86 crore April 2016-ah a pe chhuak a. Original Property Document pawh Bank hian an kawlsak a ni âwm e. Hetah hian Sale Deed leh Possession Certificate a tel bawk a ni.
Hemi hnu lawk, June 2016-ah chuan he Bank hotute hian Manoj-a document-te chu loan an buaipui naa an tihbo thu Manoj-a hi an hrilh a! Bank thuneitute chuan Manoj-a complaint chu an ngaihsak tha duh ta tlat lo mai a. Ani,Manoj-a chu Banking Ombudsman hnenah a zualko ve leh ta a. B. O. hian September 2016-ah ICICI Bank chu duplicate copy pe chhuak thuai tur leh Rs. 25000/- chawi turin a remsak a. Hei hi ICICI Bank-in deficiency in service an tih vang a ni.
He thu tluknaah hian a lungawi theih loh avangin National Consumer Commission-ah a ‘appeal’ a. A tawi thei ang berin kan sawi ang. ICICI hian an ti dik lo a ni e. Thiam loh an chang hul hual e, tiin a hma lama kan tarlan ang hian ICICI Bank chu Rs. 25 lakh he State Commission hian a lo chawitir ta chiam mai a ni.
Chhiartute ka chah:
Raltiang ramah chuan hetiang hi a ni zel. In lo hriat ka duh a ni. Harh chhuak peih lo, harh chhuah tum lo Mizo mipui hmaah ka rawn chhawp chhuak a nih hi! Awmzia nei maw le.
I tan Consumer Protection Act a awm e..
I tan Centre for Consumer Education a ding e.