Kar kalta khan Assam chief minister Himanta Biswa Sharma chuan Barak valley chu Assam atang in lak hran duh an nih chuan an hnial lem loh tur thu a sawi chhuak a. Mipuite lungrualna leh duh dan anih phawt chuan keini chuan ka dang lovang a ti a ni.
Barak valley an tih mai hian Cachar district, Hailakandi district leh Karimganj district hi a huam a. Karimganj district leh Hailakandi district hi tunhma Cachar thin atanga 1989 a lak hran chauh kha an ni a. Helai ruama mihring cheng hi nuai 40 aiin an tam a ni. Mi cheng tam ber hi Bengali an ni a. Assam in awp mahsela Assamese tawng hmang lova Bengali tawng hmang an ni a. 1960 a Assam sawrkarin Assamese tawng kha compulsory a a puan pawhin helai ruamah hian duh loh vanga nawrhna nasa tak a thleng a, mi 10 laiin an thih phah nghe nghe a ni.
Cachar in dan chungchang sawi hi kan ram tan India ram state danga thil thleng nen a in ang lova. Cachar nena ramri kan nih avangin min khawih tel lo thei lova. Cachar hi state ani emaw, UT in emaw Assam atanga a hran dawn chuan ramri a neih a ngai a. A huam chin tur ramri rin fel a ngai ngei dawn a. Kan ram nen ramri kan intawm a, inchuh buai lai ram kan nei bawk a. Assam nena kan ramri hi 167km lai a ni a. Chuvangin Assam CM thusawi hi kan bengvar lo thei lova. Kan state chungchang thu ni loah chuan kan tan thil pawimawh leh ngaigven ngei ngai a ni.
Ngaihthah vang ni lovin, British hovin min awp lai te, Mizo district a lo pian laite leh UT kan ni chhoh lai khan kan ram hi ramri siam thuah kan duh dan nilovin, nasa taka sahhek a lo ni tawh thin a. 1933 khan Assam sawrkar chuan kan ram chin 509 km chu forest reserve area a lo puangin a hnuah he reserve area hi Assam kutah a dah tawh a. Keini lamin helai hi kan ta a ni kan ti a. Chu reserve area chu UT khan kan chhawm chhuak ta hauh lo mai a. Chu chu vawiin ni thlenga kan ramri buai tawp hlei thei lo lo pian dan pawh a ni a. Hun kal tawha kan ram sahthlak then a lo nih dante, a hun laia thuneihna kan neih loh avanga buaina tawp thei lo lo irhchhuah dante hre rengin a hun laia kan chet vat a hun ta.
Ramri buai kan neih mek chungchanga kan sawrkar leh Assam sawrkar indawrna kal lai lah chu lipuia lungtum vawmluh ang maiin a pil vang vang mai a. Asaam sawrkar hian he harsatna hi an ngaihven tawk lo nge buaina chinfel aiah nakina la in dang tur tho Cachar dahhranna remchangah a la ta mai zawk hriat a ni lova. Assam state hmachhawn lovin buaina chingfel tur hian central kan hmachhawn ta zawk dawn hriat a ni lova. Assam hian central lam kuta a lo dah ani emaw, keini tan chuan a thu a ngai reng a. Mipui leh sawrkarin kan ngaihtuah a ngai. A hun laia thirling chu kan den a hun takzet tih i hria ang u.