England in Euro 2024 qualifying an khelh meka hnehna an la chan vek chu tihtawp a ni a. Ukraine nen inkhelin 1-1 in an inhnehtwk.

Wroclaw a Inrinni zana Tarczynski Arena a inkhelah hian Ukraine an phur a, an fans 40,000 hmaah inkhelin an ramah inkhel thei lo mahse khelmual chhung chu ‘Ukraine home’ a ni tih a chiang.

Minute 26-naah an duhthusam ang ngeiin goal an khung a, Yukhym Konoplya ball cross atangin Oleksandr Zinchenko chuan Ukraine tan goal a khung.

England in ball an chang hnem, mahse awmze neiin hlauhawm an siam tam lo. Halftime dawnah chhanhimtu Harry Kane bawk an mamawh a, ram tana Kyle Walker goal khung hmasak ber tur a siamsakna ball pek a mawi.

Point hnih hloh mahse England in nakkum Euro atana tling turin kawng dik an la zawh a, mahse an inkhel erawh an siamthat thuai a tul ang.

Germany an mualpho

Volkswagen Arena-ah Germany in Japan an mikhual a, 4-1 in friendly inkhelah an tlawm.

Japan tan Junya Ito chuan goal hmahruai a khung a, hei hi forward Leroy Sane chuan sut mahse Ayase Ueda hmanga hma an hruai leh hnuah Takuma Asano leh Ao Tanaka ten huntawp dawnah goal an khung belh.

Germany hi an match hnuhnung panga atang vawi li an tlawmna a ni a. Nizan khan coach Hansi Flick an ban mai dawn nia sawi a ni nasa hle.

Inkhel dang

Portugal in match nga atang a vawi nga nan hnehna an chang a. Slovakia lakah 1-0 in an chak.

Team pahnihte tana inkhel hautak angreng takah Manchester United captain Bruno Fernandes chuan halftime dawnah an chakna goal a khung.

Spain in Georgia lakah goal sarih an khung a. An rawlthar Lamine Yamal chuan record thar pahnih a siam.

Kum 16 leh ni 57 a upa niin substitute bench atanga dah luh a ni a, ram tana inkhel thei naupang ber a ni a. Minute 74-naah an goal hnuhnung ber khungin Spain tana goal khung thei naupang ber a ni bawk.