American tleirawl beiseiawm Coco Gauff-i’n a theihna sang tak chu a tak ram a thlenpui a. A Grand Slam title hmasa ber la turin US Open final-ah Aryna Sabalenka a hneh.

Seeded number six nihna changtu Gauff hian tun tournament a a inkhelh hmasak tum ho ang lo takin a khingpui aiin bul an tan tha lova. Insiamthat erawh theiin seeded number two Sabalenka hi a beilet a, a tawpah a tlo zawkah a tang.

Kum 19 mi hian amah tantu khahna Arthur Ashe Stadium-ah 2-6 6-3 6-2 in hnehna a chang.

Gauff hian vawiin a WTA rankings thar tihchhuah a nih hunah no.3 a luah dawn a, professional tennis a khelh chhunga a la san ber tum a ni ang. Hetihlai hian a khingpui hi tunkar khan world number one thar a ni dawn tih erawh a chiang tawh.

Tleirawl a ni mai ta lo

Kum 15 mi niin Gauff hian kum 2019 khan Wimbledon-ah tennis khawvel hmaah a inlar a, Venus Williams hnehin a hming a chher.

Theihna sang a nei tih an hria a, a kum a la naupan bawk avangin hun a ngah. Zawi muangin professional tennis-ah hmalam a pan a, hmanhmawh a ‘pressure’ ngah taka kal a tum lo.

Heng zawng zawng hian rah tha chhuahin kum 1999 a Serena Williams hnuah US Open a American tleirawl champion leh hmasa ber a ni.

Kumin Wimbledon-ah round hmasa berah a tla nghal a, beisei angin a che lo. Mahse an rama hard court season-ah erawh a che tha.

A ball vuak dan hrang hrangah a inzir bakah chiai loh leh rilru tih paukhauh a inzir nasa a, final a set hmasa ber a hloh hnuah a chhawr hle.

“Mak ka la ti deuh zawkin ka hria, awih mai pawh har ka la ti.”

“Pathianin harsatna hrang hrangte, fiahna te kan hmaah a dah thin niin ka ngai a, hei hian he hlawhtlinna hi a ti hlu leh zual a ni. Sawi ngaihna ka hre lo ka lawm a ni.” a ti.