- Ruata
Austria company lar, Kraftfahrzeuge Trunkenpolz Mattighofen (KTM) te bike lar 250 Duke leh 390 Duke chu a chhuan thumna (third generation) model tihchhuah a ni leh ta a, thil thar hrang hrang kan hmu dawn a, a mawi hle bawk a ni.
KTM 250 Duke and KTM 390 Duke thar hi a indawt danin Rs 2,39,000 leh Rs 3,10,520 man te a ni a. 250 zawk hi a hma aiin Rs. 779 velin a to belh tawk a, 390 zawk hi Rs. 13,045 in a hma aiin a to belh thung a ni. KTM 390 Duke hi TVS Apache RTR 310, Triumph Speed 400, Bajaj Dominar leh BMW G 310 R te nena inel mek a ni a. 250 Duke zawk hi chu Suzuki Gixxer 250, Bajaj Dominar 250 leh Husqvarna Svartpilen 250 te hi a tlukpui deuh a ni ve thung a. He bike thar pahnihah hian a nghahchhan, a khawl bawr leh design hrim hrimah pawh hian danglamna kan hmu neuh neuh a ni.
- New KTM 250 Duke
250 Duke tharah hian a power a san hret bakah a khalhtute tan nuam zawka khalh theih tura duan a ni a, a kentel pawh thil thar leh changkang kan hmu neuh neuh bawk a. LED headlight a awm bakah a tank extention mawi tak kan hmu a. 5-inch digital instrument cluster with smartphone connectivity, USB Type-C charging port leh turn-by-turn navigation te kan hmu bawk a ni.
A khawl lamah chuan khawl thar hlak, LC4c single-cylinder liquid-cooled engine , airbox lian zawk leh cylinder head design thar nei a hmang a. He khawl hian 31PS power leh 25Nm torque a pechhuak thei a ni. Suspension lamah chuan a hmalamah 43mm WP Apex big piston fork leh a hnung lamah WP Apex emulsion monoshock te kan hmu a. Kg 163 a rit a ni tawh dawn a. KTM 250 Duke hi rawng chi hnih – Ceramic White leh Electronic Orange te a awm dawn a ni.
- New KTM 390 Duke
KTM 390 Duke-ah thung chuan 399cc liquid-cooled engine kan hmu a, hei hian 44.86PS power leh 39Nm torque lai mai a pechhuak thei a, a chak tha hle a ni. Acceleration lamah chuan 0 to 60kmph hi second 2.4-ah leh 0 to 100kmph hi second 5.9-ah a thleng hman a. Electronic speed limit neiin hei hi 155kmph-ah dah a ni.
Gearbox thar tha zawka thuam a ni a, a khawl vawng dai tha turin radiator fan pahnih a awm a, cylinder head thar bakah airbox thar lian zawk te kan hmu bawk a ni. Riding mode pathum – Street, Rain, leh Track a awmin launch control feature a awm thar bawk a. Wheelie control leh quick shifter awm bawkion a brake lamah chuan a hmalamah 320mm disc with radial calipers leh a hnunglamah 240mm disc brake, cornering ABS with supermoto mode awm tel a nei bawk a ni. Duke thar pahnih hian platform leh suspension system bik hi an intawm a ni.