Vawk pul hri, African Swine Fever (ASF) thawh thumnain Kawlkulh khua a tibuai mek a, vawk 260 a thi tawh.
Vety department hotute hnen atang thudawn danin ASF leng thawh thumna hi May thlaah a intan a, Mizoram khawchhak tlangdung chu hri leng hian a tuam a, vawk thahnem tak a thi a, hri leng hi a ziaawm chho deuha ngaih a nih hnuah July thla atang khan Khawzawl district chhunga Kawlkulh khuaah ASF hi a lut ve leh a, ni tin vawk thi a awm.
Nimin khan Kawlkulh khuaah vawk pariat a thi leh a; he khuaa ASF a len tan atanga nimin thleng, thla hnih chhungin vawk 266 a thi tawh a; hri leng darh zel tur ven nan vawk 140 suat a ni tawh a ni.
Kawlkulh khuaah hian vawk vulh an tam a, tun hnaiah phei chuan Aizawl leh hmun dang atanga vawk lakna ber atana hman a ni a. ASF lengin a tihbuai avangin vawk thite phumna tur pawh VC ruahmanna hnuaiah thlanmual siam a ni a, vawk thi an tam zel avangin thlanmual an siam pawh a khat thawkhat tawh a ni.
ASF leng thawh thumna hi Lunglei district-a Pukpui pawhin an tuar na hle a, kuminah ASF vangin vawk 260 a thi tawh a. Vety department-in an chhinchhiah danin kumina ASF leng thawh thumnaah vawk 825 a thi tawh a, vawk 459 suat a ni tawh bawk a ni.