BJP Mizoram President Vanlalhmuaka chuan kumin MLA inthlanpui lo awm turah BJP chuan cheng nuai nga hmanga bultanpui turin manifesto an buatsaih niin a sawi.
Thawhtannia chawlhkar thar inhlanna neih pahfawma political session an neihah thu sawiin Vanlalhmuaka chuan Mizoram hian a buaipui loh tur leh a hlawkpui miah loh tur a buaipui a. Tun lai pawh hian India tih emaw, Bharat tih vel a buaipui mek a, India tih vang emaw, Bharat tih vang emaw hian a hlawhin an hlauh phah em tih hi inenfiah a ngai tih a sawi.
Vanlalhmuaka chuan BJP chuan India tih emaw, Bharat tih emaw, eng hming pawh nise Mizoram tluchhe mek tun dinna turin leh economy chhe lutuk siam thatna tur an buaipui zawk tih sawiin, “BJP chuan cheng nuai 5 hmanga bultanpui turin manifesto kan buatsaih a. Mi retheiten chu sum hmang chuan bul kan tan thei tawh dawn a ni,” a ti.
Hei mai bakah lo neitute tan KCC loan kaltlangin a pung awm lova loan puk theihna famer-te tan a la awm bawk tih sawiin, “BJP chuan farmer-te hi kan ram dinchhuahna bulpui an nih vangin kan ngai pawimawh a. Kan ram economy siam that nan pawh chu tho chu a pawimawh avangin kan hmalakna tur a ni,” Vanlalhmuaka hian a ti bawk.
BJP Mizoram president chuan Mizo Kristiante hian Pathianin malsawmsakna tinrenga malsawmna a dahsak tawh pawh an ta tur a niah an ngai tih sawiin, “Development rawn thleng turte chu Hindu emaw ti tlat rawngbawltu kan nih hlawm avangin Mizoram hian retheihna hi kan ta bik emaw kan ti ta tlat a ni,” tiin, development hi ringtute ta zawk ani tih hre chungin BJP, development party hi Mizoram rawn thlang turin mipuite a sawm.