Aizawl: Health & Family Welfare Department Minister Dr R Lalthangliana’n nimin khan Saitual Chief Medical Officer (CMO) office building chu khuallian niin a hawng.
CMO office building thara hawnna inkhawmah Dr R Lalthangliana chuan Covid-19 lengin hun rei tak Mizoram a tuam avangin sum thahnem tak a luang ral a, chuti chung chuan hri leng zawh hnu reilo teah district thar pathuma CMO office hawn theih a peihfel a ni chu a lawmawm a tih thu a sawi.
Dr R Lalthangliana chuan health department chu department hnathawh dan danglam deuh bik a nih avangin sorkarin pawhin a ngai pawimawh takzet tih sawiin, “Doctor pension hun pawh kum hnih a pawhsei a ni a, tun hnaiah nursing directorate pawh establish tur a notification tihchhuah a ni tawh. Hetih rual hian nurse-te ram danga an thawh theihna tur pawh theih ang anga dapsak an ni a, indawrna a kal mek a ni,” a ti.
Doctor indaih lohna chungchang sawiin health minister hian tunah hian doctor sorkarin a chhawr lai mi 30 chuang PG an zir mek thu te, service laite an lo pension a nih loh pawhin nunna chânte an awm thin thu te, ZMC a final year zo tawh ho pawh internship an tih mek bawk si nen, district hospital-a doctor post ruak hnawhkhat turin tun dinhmunah a harsat rih thu a sawi.
Saitual CMO bilding hi Rs nuai 441 senga Lushai Engineers ten an sak a ni a; Mizopa chhiara chhawng li-a sanga sak a ni.