US President Joe Biden-a chuan Prime Minister Narendra Modi-a nen Delhi-a an inkawmnaah India-a mihring dikna chanvo palzutna a thleng nasa tha a tih loh thu leh chanchinbumite zalenna pek a pawimawh tih a sawi tih a sawi.
Biden-a hi Indian khawpuiah hia G20 Summit-a tel turin a zin a, Modi-a nen hian an inkawm nghal bawk.
US president hian summit zaw fel hma deuh, Pathianni khan Vietnam tlawh turin India a chhuahsan leh tawh.
Activist leh dikna chanvo humhalhtute chuan Modi-a sorkar hnuaiah hian India-ah mihring dikna chanvo palzut a thleng tam telh telh niin an hria a ni.
Miin kum 2014-a Hindu nationalist BJP kaihhruaiin thuneihna an chan hnuah hnam leh sakhaw zuitu tlem zawk, a bik takin Muslim-ten kut an tuar nasa nia puhna chu a sorkar hian a pha nasa hle thung.
Biden-a hian Hanoi a thlen hnua thuthar lakhawmtuten an kawmnaah Modi-a nena an inkawmnaah hian India-US inkar ngheh lehzualna tur thil tam tak an sawi tih a sawi.
“Hei bakah hian ka lo tih fo tawh angin, mihring dikna chanvo inzahsak leh ram than nana pawimawh tak pakhat, chanchinbumite leh vantlang pawlte zalenna siam chungchang pawh ka sawipui a ni,” a ti.
Reporters Without Borders (RSF)-in May thlaa World Press Freedom index tihchhuah hnuhnung berah chuan India hi chanchinbumite zalenna kawngah nikum aiin dinhmun 11 zeta tlahniamin ram 180 zingah 161-naah daih a awm.
Campaigner tam tak chuan Biden-a pawh telin, khawthlang ram hruaitute chu hemi chungchang hi Modi-a sawipui turin an nawr thin a; mahse, mi thiamte chuan US hian India hi China lian zel tur a dan theihna tura hmanraw tangkai a nih avangin a nawrna ngam lo niin an sawi.
May thlaah khan Modi-a hian US hi tlawhin lawm taka lo dawnsawn a ni a. A tlawh hma hian White House National Security Adviser Jake Sullivan chuan thuthar lakhawmtute hnenah US thlirna chu a chiang a, zalenna tithuanawp thei chu a do zel dawn tih a sawi.
Hanoi-ah hian Biden-a hian India-Middle East-Europe economic corridor deal chungchang pawh a sawi chhuak a, hei hi G20 Summit-ah pawh khan sawi chhuah niin ‘inkungkaihna siamna tura bul tanna’ tiin a sawi hial a ni.
Corridor-in a tum hi Middle East ramte chu India-a lawngchawlhna nena rel hmanga thlunzawm a ni a, hei hi mi thiamte chuan China-in Belt and Road project a neih mek do letna tura ruahman niin an ngai.
Biden-a hi Zirtawpni khan G20 Summit-a tel tur hian India a thleng a. A thlen hnu lawkah Modi-a nen hian inbe nghalin Modi-a chenna inah zanriah an kil dun bawk.
Modi-a hi prime minister a nih hnuah vawi khat man amahin chanchinbumite a la kawm lo va, mi nena an inbiak zawk emaw, zanriah an kil zawhah emaw pawh chanchinbumite chu zawhna zawt turin a la sawm ngai miah lo bawk.
India-in hruaitu pahnih inbiak zawha thuchhuah a siamah chuan kawng hrang hranga thawhho dan tur an sawi thu an tar lang a, mihring dikna chanvo an sawi dun tih erawh engmah tar lan a ni lo thung.