Aizawl : AMC Ward III Corporator C Lalchhandami chuan hruaitu tha awmna state apiang an hmasawnna a chak a, Mizoram pawhin hmasawnna tha leh tluan tlin a neih ve theihna’n hruaitu tha neih a tul niin a sawi.
ZPM in Inrinni khan Bawngkawnah Street Campaign an nei a. He huna thu sawitu C Lalchhandami chuan, Mizoram chu kum 37 lai state a ni tawh chung hian state thenawmte aia hnufum leh hmasawnna chak lo takin a awm a. India ram state mai ni lo, hmarchhakah pawh hmachhawnna chak lo ber pawl zingah Mizoram a tel chu a lungchhiatthlak hle tih a sawi.
Hruaitu tha awmna state apiang an hmasawnna a chak tih sawiin C Lalchhandami chuan, “Keini aia state te zawk Sikkim te pawh han thlir ila, power lama an hmasawnna te, kawng hrang hranga an hmasawnna te hi a ropui hle. Hei hi eng dang vang ni lovin Chief Minister tha an neih vang a ni,” a ti a. Ram retheihna lak ata zalenna hmuh a nih theihna turin Chief Minister tha neih ve hi Mizoramin a phu tih a sawi.
C Lalchhandami chuan eiruk hluar em em na thin Bihar te pawh chief minister tha an neih hnua an hmasawnna leh eirukna nasa taka nawr tawm a nih thu a sawi a. Mizoramin MLA tha tak tak a nei chungin a hruaitu lu berin a zir miau loh avangin a hmasawn pui hlei thei lo tih sawiin, “ZPM chuan Chief Minister atan Pu Lalduhoma, hlemhletna laka fihlim leh a tak taka ram veitu kan rawn chhawpchhuak a, he ram damna tur hian a rintlak tawk a, i ringngam ang u,” a ti.
ZPM MLA Candidate te chu eirukna lama fihlim turin an intiam vek a, ram siamthaa hmalam pan turin an ngaihtuahna zawng zawng an seng a. Chief Minister tha hnuaiah ram siam tak tak turin an rinthlak ngei dawn niin a sawi bawk.