Aizawl: Rural Development Minister Lalruatkima chuan Mizoram hi Zofate chenna tura Pathianin a pek, humhalh ngai a ni tih an hriat avangin huaisen takin ram tan MNF sorkar hnuaiah Zofate an ding mek tih a sawi.
Thawhtannia Ngopa-a Community Hall leh lirthei dahna inkawp hawnna hmanpuitu Lalruatkima chuan, Pathianin Zofate insuihkhawmna kawng a rel sak dan chu ropui a tih thu a sawi a. “Kan unaute chak lakna dan beh an ni a, Mizoram lam atang lovin chak a lak theih loh a. Ngopa road-ah motor lian a tlan tam phah hle,” tia sawiin, Zo hnahthlak unaute damkhawchhuahna a nih phawt chuan kawng chu chhe rih mah se, Pathian zarah siam that a nih zel tur thu a sawi.
Zo hnahthlak hnamin buaina hrang hrang a hmachawnna karah pathianin a ensan lo tih a chiang a, hmasawnna hna kal mek zel kara nationalism-in mawi takin par a chhuang mek zel bawk tih sawiin Lalruatkima chuan, “Kan unaute nena kan inunauna kan lantir dante hi a va mawi em! Zofate hi engtik niah emaw chuan rorelna pakhat hnuaiah zalenna famkim nen kan la leng za ngei ang. Chumi hlimthla chu tunah hian a lang mek a ni,” a ti.
I&PR minister hian tun MNF sorkar ding lai chu an vanduai hle tih a sawi a. Vawk pul hri nasa tak leng avangin sum nasa tak a hloh a. Khawchhakah lirnghing avangte, kum hnih chuang hripui leng avanga hnathawk hlei thei lova an awm thu te, Mizorama la awm ngai lo helicopter hmanga kang thelh ngai hial te, ramriah buaina avanga silai hial puak khawpa ram leh hnam chhan a ngai a. Heng harsatna hrang hrangte lakah sorkar a tlanchhe lo tih sawiin, “Huaisen takin ram tan he sorkar hnuaiah hian Zofate kan ding mek a ni,” a ti bawk.
Minister hi bialtu MLA Dr L Thangmawia’n a tawiawm a ni.