- Mamawh dilna hun lawmawm
Inkhel en tui tak tak tawhte hian thil dang hi an ngaithla liam puat thin a, an ngaihtuah ut ut peih ngai lo. Hemi hun chunga i thusawi zat ve pawh hi a hrechiang lo mai thei. Khai le, i mamawh leh duh tak, thawmhnaw emaw ei tur emaw lei nan pawisa han dil chhin teh! “Mama nu, a tha a lawm, ka bag-ah khan pawisa a awm kha,” a tih loh ring ngam suh. Khang i thil dil vel ai kha chuan goal leh yellow card hmuh hman loh te kha a hlau fe zawk. Hrethiam? I duhzawng sawiin dil chhuak la, pekin i awm mai ang.
- Taksa tuaihnumna hun tha
Ram changkangah te chuan zai rei tak tak thlengin ‘beauty parlour’ hi an hawng thin a, incheina hmun a nih kher loh avangin mi tam takin taksa tuaihnum nan leh chei thatnnan an hmang thin. Ni lengin In lamah emaw office- ah emaw hah takin hun i hmang tawh a, zan lamah tlema hun thawl i neih hun a lo ni bawk si a, hei hi tangkai tak hmanga, intuai hnumnan emaw ‘Gym’ -a kal, a nih loh vek paw’n In chhunga ‘Exer’ lak san daih mai tur a ni.
- Thenawm khawvenga len chhuah theih hun
Inkhelh a chhuah tawh chuan mipa te hi TV bak- thil dang bih ngur ngur an tum lova, leng chhuak tur pawhin an tirh theih loh bakah, len cheh tak takte pawh In-ah an tawm tlat tawh thin. Hei taka hi hun remchang chu a ni a, thenawm khawvengah emaw, thianhnai vai tak takte In-a lenna hun a inhawng tha hle a, tangkai taka hman a tha. TV entui lai hian, ‘Khapna awka’ aiin, ‘Enliamna tawngkam’ hi mipate hian an phuh chhuak nasa hle thin.
- Mimal hunawl leh remchang
Nupa nih mai vanga pasalte nena insi lek leka awmdun reng emaw, pumkhat nih tawh mai vanga inkuah ngur ngur reng tur tihna a ni lo. Pasal te hian thlahlel thin pawh nise, inkhelh boruak tang takah hi chuan an rilru-ah a phe zeuh pawh a lang lo. Chuvang chuan, he hun hi nangma mimal thil pawimawh leh tuizawng ang chi tih leh, buaipuinan hun rangkachak a ni tih hria-in, rilru engthawl leh hahdam takin kalpui rawh le.
- Hneh loh chuan, zawm mai rawh
Inkhel en hi i tui emaw, tui lo emaw i pasal hi kawng hrang hranga tlansan hleih theih loh a ni a, amah pawhin sawi chhuak kher lo mahse, engemaw chang hi chuan a duh ber team han tan pui emaw, a team tan ber jersey hak a, a bula ‘hot’ taka lo au pui vel te hi a lungthu tikimtu pawimawh tak a ni a.
Ni e, Inkhel a chhuah apianga, No. 1-4 hi hman zel tur tihna a ni hauh lova, pasal bula thut a, bengchheng lo siam ve te pawh hi a tulna chen a awm a, a thinrim lo khawp ang.