Aizawl: Nimin khan Serchhip district chhung, Keitum khaw chhung Venglaia kawng laih zauh hna thawhnaah lei a min a, hnathawktu pakhat a delh hlum.
Keituma atanga thudawn danin National Highway 54 kawng laih zauh hna thawh mekah Keitum Venglaia retaining wall siamna tura foundation laih zawh tawh, culvert kawng ko chu chhun dar 12:30 vel khan a min a, chhiatna a thlen lai hian mi panga hnathawk awmin an zinga pathumte chu an insaseng hman.
Insaseng hman ta lo, Dhahanjoy Reang (24), Piplacherra, North Tripura lam mi leh Abhimang Kumar (34) chu lei tla hian a chhilh a, Keitum khawtlang mipui tlawmngaiten theihtawp chhuaha lakchhuah an tum nghal a, Abhimang-a zawk chu a kawng chin leivungin chhilhin mi tlawmngaiten la chhuakin a nunna chhan hman a, Dhahanjoy Reang erawh lemin hian a taksa pum chhilhin chhanchhuah hman a ni ta lo a ni.
Leimin avanga thi ta ruang hi Keitum Br YMA chuan lain kuang an siamsak a. Serchhip District Hospital-ah postmortem a ni a, hemi hnuah company lam kutah hlan nghal a ni.