Mamit District Football Association (MDFA) chuan kum 2023 hi an kum 25 na Silver Jubilee a nih angin, a lawmna chikhat atan ni 15 September 2023 hian Tripura (Zampui) State nen Laldenga Football Ground, Tuidam-ah Inpumkhatna Football Match an buatsaih dawn.
MDFA Annual General Body Meeting June ni 29 a neih in a lo rel tawh, ‘MDFA Silver Jubilee lawmna pual in Tripura State (Zampui) te nen Friendly Match neih ni rawhse’ tih angin MDFA team leh Tripura Group YMA team te chu an inkhel dawn a. He inkhelh hian thupui nei in, ‘Inpumkhatna’ tih a ni dawn a ni.
He Inpumkhatna match khel tur hian Tripura Group YMA lam pawh an group huam chhunga player thate thlangin September thla tir atang khan Vanghmun khuaah training an tan tawh a, MDFA pawh in Mamit District khaw hrang hrang atangin player thate thlangin inbuatsaihna a kalpui chho mek a, player zingah pawh Mizoram leh India aiawh a lo khel tawhte, India ram mai ni lo Foreign thleng a lo training tawh leh Mizorama player mi hriat hlawh tak tak te pawh in an khel dawn a ni.
Lalropuia, Honorary Secretary MDFA chuan, MDFA Silver Jubilee lawmna pual a Tripura nen Inter-State Friendly match kan nei thei tur hi kan lawm hle a, Tripura Group YMA in kan sawmna min pawm sak avangin an chungah kan lawm hle a ni. He inkhelh hian Tripura a kan unau Zofate nen Inpumkhatna nasa zawk leh tha zawk kan neih kan beisei a ti a. Lalropuia chuan Pu Robert Romawia Royte, Sports Minister in a phur pui avangin an lawm thu leh a ma ho in he inkhelh hi neih a nih tur thu a a sawi bawk a, tin, Tuidam khawtlang leh khawtlang mipuiten he Inpumkhatna inkhelh hi an hlut viau a rin thu a sawi bawk.
Mamit District Football Association hian an kum 25 na pual in programme hrang hrang an buatsaih chho zel a, Silver Jubilee lawmna pual hian ni 25 September 2023 atang hian Mamit District Inter-Village Football Tournament an buatsaih dawn bawk a, he tournament ah hian Champion lawmman pawh Mamit District a infiamna lama lawmman tamna ber a ni dawn a ni. MDFA Silver Jubilee lawmna pui ber chu ni 20 October 2023 hian Mamit-ah nei tura ruahmanna kalpui a ni bawk.