Kan sawrkar chuan mipuite hnenah an programme pawimawh bera an neih SEDP chu an sem chho mek zel a. A tira mipui an thlemna ber chhungkaw tin hnena cheng nuaithum sem erawh an sawi ri ta lo a. Nuaithum aiah Rs 25000 te in an sem a. Inthlan dawna tan an lak theihna vawrtawp pawh niin a lang a. Thingtlang lamin kum 5 chhung an lo beisei leh innghahna SEDP tawpna chu a ho ta hle mai. Mahni thutiam ti miah lo nih aiah 25000 pawh chu a tha tho alawm tih mai chu an tih theih tawk ani ta a. Beiseina min siama engmah tham min pe leh silo chu ani ber mai e. A leh lamah sawrkarin mipui hnena a sen ral, engahmaha mipuiin an chan leh siloh sum chu vaibelchhe tam tak, state sawrkar sum dinhmun nghawng lawih ani lawi si. Kan kal dan hi a va hmasawn hawi kal lo em.
Kan ram dinhmun kan thlirin awmze nei lova, intihlawm nana mipui hnena kan sum senral hi a va rapthlak zozai ta em. Mipui hi chu inthlan dawnah min han tiam vak a, kan รข zo vek a. Thuneihna an chan meuh hi chuan min tawp puina chu hmasawnna lam tak tak hawi nilovin reilote lawmnaah a chang leh thin. Hnathawhna leh dinchhuah tir min tiam a. A hmingin pawisa tlem min pe a, kan lawm zel anih hi chuan mipui pawh hian hmasawn hi kan phu bik lo a ni.
Hnathawhna tur sum senral hi khawiah pawh sawrkarin a tih tur a ni. Amaherawhchu pawisa hi a tlem emaw, a tam emaw, min petute hian kan dinchhuahna tur kawng hi an ngaihtuah lo hrim hrim tih hi a chiang a. Kum tawp lam, inthlan dawna pawisa min petute hian kan dinchhuahna tur hi an rilru kilkhatah pawh an ngaihtuah lova. Mipuiin an hnena vote kan pekna tur kha an rilru zawng zawnga awm a ni.
Heti ringawta min enkawltute hi kan ramah hian mipuite hian thuneihna kengkawh zui zel turin kan tungding leh dawn em ni? Ram enkawl tur hian an tha ber lo ani tih kan hmuh fiah em emte bawk hi em ni kan duh leh ber dawn? Min hmangaihna nei miah lova kan hmuia chithlum mum tat kual veltute hi dahsawn an va hun em. Kan bialtupa hi chu a tha, min ngaihsak a, min tlawh peih tih vel mai mai ngaihdan kan neih chhung hian phengphehlepa khua kan tlai ta. Hun kan neih chhung hian i inngaihtuah fim ang u. Kan hnam party tih vel hian retheihnaah bak min hruailut lova. Kan political party dang ho pawh hi kan hnam hlawmchhiah pakhatmah an awm lo. Zpm leh Congress te pawh hi nitina kan chenpui, kan rilru ang pu, kan chaw kilpui, biakina kan inkhawmpuite tho an ni. Engahnge kan hnam thil veilotu bika kan ngaih ngawt ang. Tute emaw intih hnam bik vanga bum hian i awm tawh lovang u. Hnam hmasawn tur hian sawrkar tha, bum hmang nilo sawrkar, lawmna themlem nilo lawmna tak tak, chhungkaw innghahna ngam sawrkar siam tura kan inpuahchah hun lai, hun tha kan neih chu tun hun hi a ni ngei e. Aw, zoram mipuite hi harh a va hun em.