Nikum August thlaa Air India Express thlawhna tla chu a khalhtu tihsual leh himna tura dan zam zawm that loh vang a nih theih thu chhuitute chuan an sawi.
Mi 190 chuanna thlawhna hi Kerala-a Calicut tumhmunah tum sualin mi 21 an thi.
Boeing 737 hi Dubai atanga thlawk chhuak niin ruah sur hnuah a tumkawngah tum sualin hmun hnihah a bung a ni.
Thlawhnaa chuangte hi sorkar laipuiin coronavirus avanga ram danga a mi awmte a hruai hawte an ni.
Thi zingah hian pilot pahnih pawh an tel a. An mi phurh mi 75 chuan hliam na tak an tuar.
Thlawhna hi a vawi hnih tum tumnaa chesual a ni a. A tum hmasakah hian Kerala-a fur ruahtui tla nasa lutuk avanga a tum hleihtheih loh avangin pilot-te chuan an thulh a ni.
India-a Aircraft Accident Investigation Bureau chuan pilot chuan tum hmaa tih tur tam tak ti lovin a bawhchhia a ni tih an sawi.
Heng zingah hian ruah sur leh khaw hmuh that theih loh laia tum dawna a hnung thla (tailwinds) chettir pawh a dan tur angin a ti lo va; khaw awm dan mumal lo taka tum dawna tih tur dangte pawh a ti lo bawk niin an sawi.
Windshield wiper (tlawhna hma darthlalang hru faitu) tha mumal lo chuan khaw hmuh a tiharsa zual niin phek 257-a chhah report an siamah hian tar lan a ni bawk.
Pilot hian tih ngei ngei tur, ‘cabin crew hnenah a mi phurhte chu an tum dawn avanga an thutnaa thu tha tura ti turin’ a hrilh lo niin an sawi bawk a. “Hei hi tihhmaih pawi tak a ni,” an ti.
Khawl lam fel tawk lo pawh chetsual chhan a ni tih an tar lang a. “Khawl lama fel lo awm vangin himna tura tih tur tih theih loh a awm a ni,” an ti.