Mizoram Pradesh Congress Committee (MPCC) chuan nimin khan Tawi bial campaign hawnna inkhawm an nei a. He hunah an president, Lalsawta’n MLA inthlanpui neih turah Tawi biala an party ticket-a ding tur a puang.
Keifanga campaign khuhhawnna inkhawmah Congress President Lalsawta chuan Tawi bial Congress party candidate turin an party secretary ni lai, Lalringliana Khiangte a nih thu a a sawi a. Tawi bial tana an party candidate tur chu mi tha tak leh innghahna tlak a nih thu sawiin Tawi bial mipuite chu lo vote turin mipui a sawm.
Lalsawta chuan kut hnathawktuten eizawnna ngelnghet an neih theihna turin kumin MLA inthlana an party manifesto pakhatna, ‘Tang Puihna’ an siam dawn a. He an manifesto hi a thlawna sem ni lovin, tang tak takte puihna tur, eizawnna ngelnghet an neih theih nana din a ni dawn a. Party dangten sawi nep tum thin mah se Congress party-in chu an intiamna tihlawhtling thintu an nih avangin tun tumah pawh hian an intiam angin an tihlawhtling leh dawn tih a sawi.
MPCC president hian Congress party chu an tih tumah an chiang a, ram hmasawnna rahbi pawimawh tak tak an ngaihtuah a, ram tan, hnam leh sakhaw tana an hmachhawp sawi tur an ngah avangin an elpui party dangte sawisel hman an nih loh thu a sawi.
Mizoram tana tha tur an ngaihtuah rualin BJP leh a thawhpuite an dodal tel zel dawn tih sawiin, “Party anga dodal ni lo vin, Kristiante tan an him loh em avangin kan dodal ang a. Kan ram hian chhantu a mamawh a, chhan turin kan rawn pen chhuak bawk a ni,” Lalsawta hian a ti bawk.
He hunah hian Congress Party tana Tawi biala ding tura puan tak, Lalringliana Khiangte pawhin thu a sawi a ni.