Ligue 1 mawng a awm mek Olympique Lyonnais chuan an manager Laurent Blanc chu an ban.
Blanc hian a club hlui Paris Saint-Germain laka 4-1 a an tlawm chu Lyon inkhel a enkawl hnuhnung ber a ni a, Lyon hian Blanc nen hian a contract titawp turin inbiakremna an nei tih an sawi.
Tun season-ah match li atangin Lyon hian point khat chiah an la hmu a, Ligue 1 a goal difference nei chhe ber an ni bawk.
Technical director Jean-Francois Vulliez chuan first team hi a enkawl lailawk rih dawn a, ani hi fak hlawh tak Lyon academy enkawltu a ni.
- Chiang zawkin
Kum 57 mi Blanc hian October thla khan Lyon hi a enkawl tan a, season liamta khan league-ah pasarihna nihpui in Europe huap inelnaah an tel pha lo.
Blanc hian kum 2015-16 season zawha Paris Saint-Germain a chhuahsan hnua manager hna nghet a thawh leh hmasak ber a ni a. Hemi inkarah hian Qatar-ah hna thawk bawkin Al Rayyan interim manager a ni hman.
Lyon a enkawl chhungin an result a tha lo thin hle a, Blanc hnuaiah hian an inkhelh apiangin point 1.53 hmu ang chauh an ni a, kum 25 chhunga Lyon manager nghet zingah Sylvinho tih lova points per game nei hniam ber a ni a. Sylvinho hi league match 9 chiah club a enkawl hnuah chhuahtir lehnghal a ni.
Blanc hian manager record a nei chhe lova, Paris Saint-Germain a enkawl laiin Ligue 1 title vawi thum a lakpui a, Bordeaux a enkawl laiin vawi khat a champion pui bawk.
Amah thlaktu tur inrinsiak a ni nghal a. Brighton leh Chelsea manager hlui kum 48 mi Graham Potter hming a ri ring a, mahse kar hmasa khan Lyon sawmna hi a hnawl tawh nia sawi a ni.
Kum 45 mi Gennaro Gattuso pawh sawirik a ni bawk a, ani hian January thla khan Valencia chhuahsanin hna dang a la thawk leh lo.
Lyon hi Blanc-a’n a enkawl laiin neitu thar nei an ni a, Premier League club Crystal Palace a share nei American sumdawng John Textor chuan a lei.