Ram kaihhnawih document-te Information Technology (IT) hmanga dahthatna leh chhinchhiahna tur – Computerization of Registration, National Generic Documentation System chu nimin khan Land Revenue & Settlement (LR&S) Minister Lalruatkima’n Champhai-ah a hawng.
Computerization of Registration hi sorkar laipui hmalakna niin a Software chu Department of Land Resour- ces, Ministry of Rural Development hmalaknaa NIC, Pune design a ni a. ‘One Nation, One Software’ tura duan a ni. Cloud based Server-ah document registration te chu vawnthat niin, Mizoram chu India ramah he software hmang thei hmasa parukna a ni a, NE states zingah pahnihna a ni.
Land Revenue & Settlement Minister Lalruatkima chuan tunlai thiamna hmanga lehkha pawimawh hrang hrang – rukruk, kangmei leh chhiatrupna dang thleng thei laka vawnthat a tul thu sawiin, hemi kawnga huan, lo, ram kaihhnawih lehkha pawimawh vawnthatna tur Computerization of Registration’ hmang thei tura hawn a ni chu lawmawm a tih thu a. In hmun leh ram sorkara chhinchhiah leh chutiang lam kaihhnawih thil tinrengte awlsam zawkin mipui ten an ti thei tawh dawn nia sawiin, in hmun lei leh hralh thuah te, document bo thu ah te thlengin he hmalakna hian nasa takin a tiphuisui dawn niin a sawi.
Revenue Minister chuan LR&S Department chu mipui dawrtu nei ngah ber te zing ami nia sawiin, an hna a hautak a, mipuite pawhin an hriatthiampui a ngai niin a sawi a. Thawktu te pawh mipui dawrtute dawhthei taka lo dawngsawng zel thin turin a chah nawn.
LR&S hnuaia thawktu indaihlohna, a bikin Surveyor indaihlohna avangin mipuiin harsatna an tawh thin chu Department-in a hriatpui thu sawiin, Minister chuan Surveyor 15 lak belh tura hmalak mek a nih thu a sawi a. Mizoram thingtlang khaw 319 ah te property card pechhuak thei turin LR&S Department chu a inpuahchah mek thu pawh sawiin, hemi atan hian aerial survey te pawh neih a nih tawh thu a sawi bawk.
Rural Development Deptt. Minister ni bawk Lalruatkima chuan nimin vek khan Champhai-ah Self Help Group-te thil siam chhuah leh tharchhuahte phochhuahna leh hralhna hunpui – Sale of Articles of Rural Artisans Society (SARAS) Fair- tun thla ni 16 thleng awh tur chu a hawng bawk a. SARAS Fair hawnna inkhawmah hian Self Help Group (SHG) 44 te hnenah Bank hrang hrang atangin loan vbc 2.2 pekchhuah a ni.
RD Minister chuan Mizoramah SHG 10708 an awm mek thu leh an hnuaiah member mi 84169 an awm thu a sawi a. SHG te chuan ram economy than zelna turah leh ram intodelhna kawngah hmun pawimawh tak an luah niin a sawi bawk.
SARAS Fair hi Ministry of Rural Development chuan India ram state tina State Rural Livelihood Mission (SRLM) te buatsaih turin a beisei a. Mizoramah kum 2015 atang khan buatsaih tan niin, Champhai SARAS Fair hi Mizorama vawi 8 buatsaihna a ni.