Irish boyband lar WESTLIFE chuan India leilung an rawn rap dawn ta. ‘The Wild Dreams’ tour kal zelah November 24-26 chhung hian Mumbai, Bengalaru leh New Delhi an tuam ang.
Westlife hian Asia khawmualpui an hrut vanglai pawhin India an hmaih fo tawh thin a, Indian fan te an beidawngin, an lungni lo thin hle. Kum 2000 chho vela rimawi khawvel al hnehtu Westlife hian India ramah fan ruhkawl sang tam tak a nei a, a bik takin hmeichhe tleirawl lamin an atchilh.
Ruahman dan chuan November 24, 2023 hian RWITC, Mahalaxmi Racecourse, Mumbai-ah Westlife an inlan hmasa ber ang a, November 25 hian Embassy International Riding School Gournd, Bengalaru-ah an chhunzawm ang. Tour kharna hi November 26 hian New Delhi-ah an nei dawn a ni.
BookMyShow Live hian tour lo awm tur hi damchhunga hriatreng tham tura buatsaih tumin an inbuatsaih mup mup tawh a, Indian stage-ah engti ang takin Westlife member te hian an thiam leh theihna an pholan dawn, tih chu hriat chakawm tak a ni tawh.
Rimawi khawvela chart-topping hit thahnem tak nei tawah leh live performance chhe ngai lova sawi thin ni bawk Westlife concert en tur hian Indian thalaite an phur viau tawh a, ‘The Wild Dreams’ tour hian an thinlung leh ngaihtuahna a luah chho mek a, November 24-26 lo thleng tur hi an nghhakhlel tawh hle.