India chhim lama Kerala-ah chuan natna vâng tak, Nipah virus avanga thi mi pahnih an awm a, hei hian mi a tichiai hle.
Thi pakhat zawk hi tun thla tira thi niin pakhat hi August 30-a mi a ni a, Kozhikode district-a mi ve ve an ni tih thuneituten an sawi.
Thi chhungte ve ve hian hri hi an kai bawk tih finfiah an ni bawk a, damdawi inah enkawl mek an ni.
Tun tum hi kum 2018 hnu lama Kerala-a Nipah a darh vawi lina a ni tawh.
Nipah virus hi ‘zoonotic illness’ tih huanga mi niin sa – vawk leh bak atanga mihringin an kai thin a ni tih World Health Organization chuan a sawi.
A lo kai tawh ei leh in tawm leh an taksa tawh atangin a inkai chhawn theih bawk.
A kai thenkhat chu an taksaah natna lang chhuak pawh a awm lem lo va, a la na erawh an thawkna lam a buai hle thin a. A na tak takah chuan an thluak a khawih thei hial thin a ni.
Nipah kai hi an thi duh hle thin a, a damdawi emaw, a invenna emaw a la awm lo va. Enkawlna chu an nat dan azira pek tawp mai a ngai thin a ni.
Union Health Minister Mansukh Mandaviya chuan Thawhlehni khan sorkar laipui chuan state sorkar thawhpui turin mi thiam a tir tih a sawi.
Kerala Health Minister Veena George chuan thi ta mi pahnihin an hnimhnaih mi 168 chhui chhuah an ni tawh tih sawiin heng mite hian hri hi an kai ve nual hlawm tih a sawi.
State sorkar hian dinhmun thlithlai turin Kozhikode-ah control room a din a, damdawi ina thawktute pawh inkaihhruaina dan siamte zawm turin an ti vek tih a sawi bawk.
Kerala Chief Minister Pinarayi Vijayan chuan state sorkar chuan thihna a thleng hi a ngai thutak hle tih a sawi a, mipuite chu hmai tuam tur leh damdawi in pawh rikrum thilah chauh tlawh turin a ngen.
Hetih rual hian chiai chiamna tur a awm lo tih a sawi a, a thihpuiten an hnimhnaihte pawh damdawi inah uluk taka enkawl an nih thu a sawi bawk.