President Droupadi Murmu-i’n nimina ram pum huap atan Ayushman Bhava Campaign a hawn rualin Mizoram Larsap Dr. Hari Babu Kambhampati hovin Mizoram tan campaign hawn ve nghal a ni.
Ram pum huap tana Ayushman Bhava Campaign hawnna inkhawm hi video conference kaltlangin larsap leh sorkar hotute chuan Assembly Annexe Conference Hall atangin an chhim phawt a, hemi hnuah Mizoram tana campaign hawnna neih chhunzawm leh a ni.
Khuallian Larsap Dr. Kambhampati chuan Ayushman Bhava hmangin khaw tinah leh mi tinte ban phakin healthcare service hrang hrangte chhawpchhuah leh hemi kawnga mamawhnate zawng zawng tihhlawhtlin vek tum a nih thu a sawi a. Health department leh department danga official-te chu mipuiten health care leh sorkar laipui scheme dangte an hlawkpui theih nana thawk turin a chah a, he campaign a puitlinna tur hian kohhran, tlawmngai pawl hrang hrang leh mi tin te sorkar thawhpuiah a sawm bawk.
He inkhawma tel, Health Minister Dr R. Lalthangliana chuan Ayushman Bhava Campaign chu theihtawp chhuahin Mizoramah kalpui a ni dawn a, campaign hi a hautak dawn avangin health department chuan thlawpna tha tak a lo dawn thin angin mi mal, pawl, kohhran leh khawtlang anga thawpuina tha a awm phawt chuan he campaign hi a hlawhtling ngei dawn tih a sawi bawk.
Ayushman Bhava Campaign neih chhung hian sorkar damdawi in hrang hrangah Ayushman Mela neih a ni a, kum 30 chung lam tan hypertension, diabetes, oral cancer, breast cancer leh cervical cancer te screening tam thei ang ber neih tum a ni a, Ayushman card pawimawhna te, ABHA ID siam te, natna hrik kai theih leh TB natna vei zawn chhuahhna leh a pawimawhna, hriselna atan fimkhur leh mahni inuluk pawimawhna lam te inzirtirna neih a ni ang a, AB-PMJAY Ayushman Golden Card nei thei tura thlan tawhte chu campaign chhung hian ziah luh vek tum a ni.
Mizoram tana Ayushman Bhava Campaign hawnnaah hian state chhunga PM TB Mukt Bharat Abhiyan hnuaia mi mal, pawl leh district anga hnathawk tha zualte hnenah larsap chuan lawmpuina leh chawimawina a hlan a ni.