Alfa Romeo F1 Team chuan an driver pahnih Valtteri Bottas leh Zhou Guanyu te chu season tharah an la ring dawn a, a kum thumna atan driver line up ngai an hmang dawn tih an sawi.
Kum 2022 a Mercedes atanga Sauber team ni thin zawmtu Bottas hi season thar atana contract nei sa a ni a, nimahsela a teammate zawk hi a hmalam hun chiang lo anga ngaih a ni a, contract la ti fel lo a ni.
Alfa Romeo aiawh Alessandro Alunni Bravi chuan an team in kum 2026 a Audi team an nih hun atana inbuatsaihna an kalpui mek chu a kaltluan theihna turin team kalphung tihdanglam thui loh chu an ngaih pawimawh avangin thutlukna an siam tih a sawi.
He team hi season tharah Alfa Romeo an ni tawh dawn lova, team enkawltu Sauber Motorsport AG chuan Italian car company nena an thawhdunna an titawp dawn a, nakkum atana an hming leh thawhpui tur erawh puanzar a la ni lo.
Hetihlai hian Audi chu an team neitu zingah an tel tawh sa a, nimahsela German car company hian F1 mumal taka a luhchilh hma loh chu an hming hi an hman a beiseiawm loh.
Bravi chuan, “Valtteri leh Zhou te hi driver talent nei tha, an thiamna te kan hriatchian tawh a ni a, an pahnih hian an thawkdun thiam a, an inkawp tha hle. An intluk viau a, hmasawn turin an innawr thei hle bawk.” a ti a.
“Valtteri hi team-ah tawnhriat nei tha niin hmahruaitu nih a thiam a, Zhou hian tunhnai kum hnih chhungin nasa takin hma a sawn a, kum 2024-ah pawh hmasawn zel turin kan beisei a ni.” tiin a sawi.
Reserve driver Theo Pourchaire pawhin a la chhunzawm zel dawn tih an tichiang bawk.