Aizawl: Champhai South bial chhung, Kanan Veng Congress Unit huaihawtin nimin khan Kanan Veng Bazar-ah Street Campaign neih a ni a. He hunah hian Champhai South biala Indian National Congress (INC) atanga ding tur. Dr. Lallianchhunga, MPCC thupuangtu leh gen. secy ni bawkin thu a sawi.
Dr. Lallianchhunga chuan thu sawiin politics an khelh danah Kristian-na hi a tha bik a ni tih lantir a ngai tih sawiin, “Hei hi hnam dang ringlotute zingah pawh kan Pathian kan chawimawi theihna tur a ni a. Mipuite hnena beiseina belhchiandawl lo sawi fo te hi a Kristian lo a ni. Mipuite hnena kan intiamna hi rintlak rawh se,” tiin, politician-te hian mipuite hi beidawngin an siam tur a ni lo va, an tana rintlakin nung tur zawk an nih thu a sawi.
Party hlui pawh hruaitu tharten an hruai chuan an hnathawh dan a danglam daih thei tih sawiin Dr Lallianchhunga chuan, “Nitish Kumar vangin Bihar nasa takin a danglam thei a. Chutiang bawkin Pu Lalsawta vangin tun hma zawng aiin Mizoram hi nasa takin a danglam thei bawk. Chuvangin, Pu Lalsawta hi Congress a nih vang ai mahin a thil tuma chiang, mi nghet leh rintlak a nihna hi sorkar tha siam thei tura kan rinna chhan tur zawk a ni,” a ti.
Kanan Veng Bazar-a Street Campaign hi Kanan Veng bialtu pastor, Lalchungnunga, President, MPF Local Forum-in a kaihruai a ni.
Street Campaign zawh hian Dr. Lallianchhunga chuan Kanan Veng thlanmual lei tlakhniamna hmun tlawh nghalin Pathian leh mipuite zara tihlawhtling thei dinhmuna a awm phawt chuan Kanan Veng thlanmual siam thatna tur buaipui a tum thu a sawi bawk.