Aizawl : ZPM Champhai North Block Conference leh mi thar lawm luh inkhawm hmanpuitu ZPM Leader Lalduhoma chuan Congress ni lo. MNF ni lo sorkar din tur hian engkim an vui liam a, hmun khata an awm a ngai tih a sawi.
Champhai Kahrawt Community Hall-a nimina inkhawmah Lalduhoma chuan, Mizoramah party pahnihin ro inrelchhawkin, ruling party hming inthlak a, chief minister thutthleng a thu an inthlak a, rorelna kalphung erawh engmah a danglam chuang loh avangin a kalphung thlakthleng a ngai tih sawiin, “Kalphung thar kan mamawh a ni tiin sorkar kalphung thar kan aupui a ni,” a ti.
Lalduhoma chuan party sorkar hlir mai ramin a hrawn hian vantlang nun leh kohhran, thlaurau nun thlengin a eichhe hle tawh a ni tih an hriat avangin, party sorkar vui liama, mipui sorkar din tumin, kum 39 chhung he policy a vahvaihpui tawh tih a sawi a. Mipui sorkar din tumin a hrang tetea an beih avangin party pahnihte an hneh thei lo va, chuvangin, he’ng party pahnih ni lo zawng chu intelkhawm a, an chakna hi hmun khatna dahkhawm a mipui movement party an din tih sawiin, “Congress ni lo, MNF ni lo sorkar din tur hian kan engkim kan vuiliam a, hmun khata kan awm a ngai a ni,” a ti.
He hunah hian ZPM Champhai North candidate Er Ginzalal Hauzel leh AMC Corporator Lalchhandami-te pawhin thu an sawi bawk.