England defender Harry Maguire chuan Thawhlehni zana Scotland nen friendly inkhela an inhmachhawn tuma fans ten an au el chuan a tibuai lo tih a sawi.
Hampden Park a inkhelah hian Manchester United defender hi Scottish fans ten an au el nasa hle a, ball a khawih apiangin tih el zawngin an lo au thin. Maguire hian he inkhelah hian an lamah a ti goal a, mahse England hi 3-1 in an chak tho.
Maguire hian fans te khawsakzia chu a hrethiam a, inelna boruak a nih avangin a tan thil thar a ni lo tih a sawi a. “Midang tan thil a tih awlsam phah zawk a, ka chungah pressure a siam a ni mai a, midangin an khelhthat phah zawk.” tiin a sawi.
England boss Gareth Southgate chuan Maguire-a’n tunhnaia sawiselna a tawh nasat thin chu thil dik lo leh thil tha lo tak a nih thu a sawi a, a player thlavang hi a lo hauh tawh.
Scottish fans te chauh sawichhan lovin England tantute bakah club football leh media lamin an sawisel thin chu thil dik a ni lova, a nihna baka inbeihna nia a ngaih thu a sawi.
Kum 30 mi hi England in 2018 World Cup semi-final an thlen bakah Euro 2020 final an luhna kawngah a pawimawh a. A club United-ah khelhna hmun chang tam lo mahse tun World Cup-ah pawh England tan rinrawl zingah a la tel tho.