Juventus midfielder Paul Pogba chu damdawi hman phal loh chungchangah hrem a nih dawn avangin a club lamin hmalam pan dan tur an ngaihtuah a, a thlaktu tur an melh tan niin an sawi.
French midfielder hi eng chen nge hrem a nih dawn a hriat loh a, thiam loh a chan dan a zirin kum li chhung pawh a ni thei.
Italy lama chanchinbute chuan nikuma an hnena kum li contract ziak Pogba contract hi inbiakremna nei a tihtawp hial pawh an ngaihtuah niin an sawi tel.
Hei vang hian Juve hian January a player bazar inhawn hunah midfielder thar an ngaihven dawn niin an sawi a. Tun nipui a club thenkhatin an ngaihven kum 30 mi Arsenal midfielder Thomas Partey chu sawilan a ni a, kum 2025 thleng contract nei a nih avangin Juve hian an beisei ngam niin an sawi.
Ani bakah French midfielder Khephren Thuram pawh sawi tel a ni.