Aizawl : Aizawl South III North Block MNF Conference nimina a hmanpuinaah MNF President Zoramthanga chuan, ram rorelnaah Pathianin rorelna chelh turin hun a ruatsak zel thin thu a sawi.
Melriat Community Hall-a inkhawmah hian Zoramthanga chuan, ram rorelnaah Pathianin rorelna chelh turin hun a ruatsak zel thin tih sawiin, “A hun a tih tawh loh chuan, engtiang pawhin intuaithar thin mah ila, rorelna chelh theih a ni tawh ngai lo,” a ti.
Zoramthanga chuan Mizo Union vang pawh an chak viau a, an hun a liam a, an hming chawpin an ral a. Chutiang bawkin PC party chu an hun a liam a, an that loh leh fel loh vang pawh ni loin, an ral mai a. Remna leh muanna atana hlu em em Congress party pawh an hun a liam chuan, tunnun ngaihna an awm tawh lo a. Inthlan leh hunah pawh an tihfuh loh chuan an arte lukawn hial thei a ni, a ti.
MNF President chuan, “Tun hun hi arsi hun a ni a. Arsi hi MNF-in kan duha kan neih a ni lo. Kan duhber chu sakei a ni a. Mahse, chunglamin a ruahmanna chuan kan duh reng vang pawh ni loin, ECI lamin arsi min pe mai,” tiin, Arsi enzual hun a nih tak thu a sawi.
ZPM chungchang sawiin Zoramthanga hian, kalphung thar tiin ZPM leader te kum tam tak an au a. Hming pawh vawi sawm chuang zet an inphuah kual tih sawiin, “Vice President tawl ngah ber an ni hial a ni. Kal dan tharin ruahmanna an aupui thar leh a. Engkim chhe vek tih auhla nen, negative politics game an rawn aupui a. Kan innghahna chu kohhran, kohhran hi kan unit an ti a. Party niloin movement kan ni an inti a. Anmahni chiah thaa inngaiin, Pu Hawla, Pu |hena leh Pu Rama chu sual leh chhe tawpah an puh a. Kum 1984 vel atanga party thlak kual thinte kha hrechiangtu an tam a, enchhin tlakah an ngailo. Kum 2018 inthlanah pawh under 10-ah an ding a ni,” a ti bawk.
Aizawl South lll North block President Vanlalfinga kaihhruai inkhawmah hian, MNF President Zoramthanga’n an party-ah mi eng emaw zat a lawm lut a ni.