Aizawl: Chief Minister Zoramthanga chuan nationalism chu hnam dangte va huat emaw, va ngaihtheih loh lam emaw a ni lo va, Pathianin min pek ram leh hnam humhalha dinchhuahpui a nih thu a sawi.
He thu hi nimin Youth 20 Meet on Nationalism, Patriotism & Development kharna inkhawm, Pachhunga University College Multipurpose Auditorium-a neihah a sawi a. Chief minister chuan Mizoram leh hnam humhima din chhuahpui chu mi tin mawh a tih thu te, a bikin thalaiten mawhphurhna an nei lian hle tih a sawi.
Zorama chuan Zofate nationalism bupui chu Mizoramah a awm a, hmun hrang hranga cheng Zofaten Aizawl chu an khawpui ralmuang leh him niah an ngaih vek thu te a sawi a. Mizoramin harsatna hrang hrang tawh thin mah se a la ding chhuak dawn tih a sawi bakah Mizo hnam chu hun hnuhnunga a chanchin tha hriltu atan Pathian ruat a nih thu a sawi bawk.
Khualzahawm, Sports Minister Robert Romawia Royte pawhin thu sawiin Mizo thalaite mamawh tak, thalaite ngaihtuahnaa nationalism leh patriotism tuh ngheta hmasawnna pawimawhzia inzirtir a tul thu te a sawi.
Ram leh hnam hmangaihna, ram chhanna leh hmasawnna atana intawhkhawmna, Youth 20 Mizoram hi India ramin G-20 presidency a chelh kum denchhena hmalakna a ni a, sports department leh MZP tangkawpin Mizoram chhung hmun hrang hrangah intawhkhawmna an buatsaih thin a, thla hnih chhung kalpui a nih hnuah nimin khan khar a ni ta a ni.
Youth 20 Mizoram kharna inkhawmah hian Speaker Lalthlamuana Ralte, Adviser, MZP-in Youth 20 Mizoram thupui hmangin thu a sawi a, MZP hruaitute leh Mizoram sorkara Secretary Dr. Lalrozama ten thu an sawi bawk a ni.