Italy midfielder Marco Verratti chuan Paris Saint-Germain atangin Euro maktaduai 45 in Qatari club Al-Arabi chu a zawm fel.
Verratti hi kar khat chhunga European football a player hming langsar Qatar lam pantu pahnihna a ni a, kar hmasa Zirtawpni khan Al-Duhail in Aston Villa atangin season tluan atan Philippe Coutinho chu loan in an hawh tawh.
Verratti hian PSG hi kum 2012 khan a zawm a, an hnena a cham chhungin Ligue 1 title vawi kua a la a, Italy chu Euro 2020 khan a champion pui bawk.
“Kum 10 chuan PSG kawr ka ha thei kha thil ropui tak niin ka ngai a, ka lawm hle. Khawvela player ropuite nen kan inkhel thei a, trophy 30 ka la thei kha thil lian tham tak a ni.” tiin Verratti chuan a chhuah hnuah a sawi.
“Paris leh he club leh a tantute zawng zawng hian ka thinlungah hmun nghet tak an chang reng tawh dawn a, Parisian hi ka ni reng tawh ang.” a ti bawk.
Kum 30 mi Verratti hian a club tharah hian Paris khawpuia a lo inkhelhpui tawh Rafinha Alcantara chu a inkhelhpui leh dawn a, kum 2020 atanga 2022 chhung khan PSG-ah teammate an ni.
Italian club Pescara atanga bul tan Verratti hi Saudi Pro League club te nen sawizawm ni hman mahse September 7 a transfer deadline khar a nih hma in inremna neihpui thei an awm lo.