Social Welfare Minister Er Lalrinawma chuan nimin khan Aizawl Press Club-ah thu thar thehdarhtute a kawm a. Mizoram sorkarin ruihhlo dona atan Rs vbc 3 a ruahman chu sem chhuah a nih tawh thu a sawi.
Er Lalrinawma chuan Mizoram hian ruihhloah harsatna a tawk nasa hle tih a sawi a. “Ruihhlo avang hian thalai tam takte pawhin nunna hial an chân tawh a. Hemi a nih avang hian sorkar pawhin ruihhlo do hi a ngai pawimawh a. Chief minister kaihhruaina hnuaiah ‘State Core Committee on Ruihhlo Do’ thar thawh leh a ni,” a ti.
Ruihhlo do a ngaih pawimawh avangin sorkar hian ruihhlo dona atan hian Rs vbc 3 dahin tangkai taka hman a nih theih nan sem chhuah tawh a nih thu a sawi a. Ruihhlo ngaite enkawlna tur, Jordan Center, Sethawn pawh tuai thar leh niin ruihhlo ngaiten damna tluantling an chan theih nan a tul anga programme hrang hrangte kalpui a nih thu leh thiamthil zirnate kalpui tan a ni a, tihchangtlung mek a nih thu a sawi.
Social welfare minister sawi danin Jordan Center, Sethawn chu tangkai taka kalpui niin tihchangtlin chhoh zel tum a ni a. Tunah hian he centre-ah visiting doctor-te nen mi 51 awmin enkawl lai mi 44 an awm mek a ni.
Naupang harsatna tawkten puihna an dawn theih nan child helpline din a nih thu Er Lalrinawma hian a sawi a. Helpline kaltlanga complaint an dawnte chu a rang thei ang bera hma an lak nghal thin thu a sawi a. Kum 2016 atanga July, 2023 thleng khan hemi kaltlangin naupang 14,947-in puihna an dawng tawh tih a sawiin, harsatna tawk zingah a tam ber chu naupang ngaihsak lo thubuai niin naupang kutthlak leh sexual abuse chungchanga buaina a tam hle niin a sawi bawk.